Higalakaaway, kaawayhigala

Adunay panultihon nga sa pulitika walay permanenteng higala o kaaway. Ang permanente mao lamang ang interes sa mga pulitiko. Tinuod gyud kay daghan diha nga mga pulitiko nga managhigala kaniadto o kauban ug kaalyado sa partido. Apan karon, kaaway ug manag-atbang na.

Sama na lang dinhi sa dakbayan sa Sugbo. Sila ni Vice Mayor Edgardo Labella, kinsa maoy madagan pagka-mayor sa oposisyon ug si kanhi mayor Mike Rama, kinsa maoy modagan sa pagka-bise mayor, pulos mga kaalyado sa Bando Osmena Pundok Kauswagan (BOPK). Apan karon mao na ang higpit nga karibal sa lider sa BOPK nga mao ang “kanhi laos nga pulitiko.”

Personalan naman gani ang ilang panag-away.

Midaog si Konsihal Mary Ann Delos Santos niadtong 2013 elections ubos sa Barug Team Rama. Si Rama maoy nag-recruit kaniya. Apan walay utang kabubut-on, milayat ngadto sa BOPK. Karon sila na ang magka-atbang sa pagka-bise mayor.

Sa dakbayan sa Manduae, sila si Mayot Luigi Quisumbing ug sixth district Congressman Jonas Cortes kaalyado kaniadto. Nagkahi-usa ang ilang fuerza sa pulitiko batok sa mga Ouano gumikan kay dili sila gusto nga makontrolar ang dakbayan pag-usab sa mga kamot sa mga Ouano. Si Lolypop Ouano Dizon, mao ang ilang common nga kaaway. Nagtigi sila si Luigi ug Lolypop sa pagka-mayor niadtong 2016 elections.

Apan karon, magkontra na usab sila ni Luigi ug Jonas sa pagka-mayor. Morag napalantawan ra ba nga init ang ilang panag-tigi. Unya si Lolypop nga kontra ni Jonas kaniadto, nagka-uban na pod sila.

Sila si Rep. Gwen Garcia ug Vice Gov. Agnes Magpale giisip nga managhigala sa dihang governor pa si Gwen ug Provincial Board member pa si Agnes. Sa dihang na-suspenso si Gwen balig unom ka buwan, si Agnes ang mipuli. Diha na mi-aslum ang ilang relasyon. Karon, sila na ang magka-atbang sa pagka-gobernador sa sunod tuig nga eleksiyon. Morag init ra ba ang ilang panag-tigi. Maka-ingon ta usahay nga kining pulitika, ang mga botante ray gitunto.