Mga tinahod sa recording usa-usa nang gikuha
Usa ko sa nakalitan sa balita niadtong Miyerkules nga wala na diay ang atong higalang si Jesus “Boy” Bosque tungod sa cardiac arrest.
Wa ko katuo kay bisan sa edad nga 67 padayon ug aktibo man gihapon to siyang nag-alagad isip AVP VisMin ug Special Assistant to the Chairman sa VIVA Communications, Inc.
Niadto lang Abril karong tuiga, namatay sad ang iyang contemporary nga si Baste Balboa sa Alpha Records ug si Boy Yap sa BMG Records niadtong 2014.
Sila tanan puros sakup sa kanhi Philippine Association of the Record Industry (PARI) nga maoy nagduma niadto aron molambo ang atong recording industry.
VICOR MUSIC
Kato si Sir Boy Bosque di ka ka-feel ato nga superior kay very humble, very friendly ug halos tanan tingali sa industriya iyang higala.
Siya ang sinaligan ni Boss Vic del Rosario sukad pa niadtong 1973 sa dihang naa pa sila sa Vicor Music.
Ang Vicor gikuha gikan sa mga pangan sa tag-iya niadto nga silang Vic del Rosario ug Orly Ilacad. Pagbuwag nila ni Orly mao tong nagtukod og iyang kaugalingon si Boss Vic niadtong 1981 nga naila karon nga Viva Entertainment Group of Com- panies, diin lakip sa ilang mga talent silang Sarah Geronimo, Anne Curtis, James Reid, Nadine Lustre ug daghan pa.
Ako bitaw giingnan nganong wa pa man siya moretiro, ang tubag ni Sir Boy kay ganahan kuno si Boss Vic nga naa gihapon siya ug enjoy ra man sad siya.
NEWS CLIPPING Katapusan ming nagkita ni Sir Boy sa presscon ni Anne Curtis sa pelikulang “Buybust” didto sa Parklane Hotel niadtong July.
Dinhi iyang gipaambit nako nga atol sa haya ni Baste Balboa iyang gida ang karaang news clipping nga akong sinuwat, diin naa ang litrato nilang duha ni Baste, aron ipakita ni Mama Joy (misis ni Baste) kon unsa sila niadto dihang uso pa ang cassette tapes ug CD.
Ako ning gisuwat isip yukbo nako nila nga mga “unsung heroes” sa industriya nga maoy nagdiskubre ug nagpanday aron molambo ang atong recording nga gipatay lang sa usa ka pagpamilok tungod sa mga pirata.
Ang lawas ni Sir Boy gidala na sa iyang balay sa Davao. RIP, Sir Boy. Salamat sa inyong kaayo ni Pareng Baste, Sir Boy Yap ug sa uban pa.
Sigurado kong nanag-ambahan na karon ang langit sa inyong pagkahibalik sa paraiso nga way katapusan. God bless.
HAPPY ANNIVERSARY Malipayong anibersaryo sa Superbalita Cebu nga napabiling kampiyon sa masa ug bisan sa social media padayong nag-una. 24 na ta katuig karong adlawa. Sakto ba 24? Hehe.. Salamat sa inyong way puas nga suporta mga suki ha! More power natong tanan.