Nakapaburos

Dear Noy Kulas,

Tawga lang ko og Bon, 28, taga Cebu City. Ang akong problema mao ang akong uyab nga ako nang gikasabot nga magmiyo mi next year.

Karong bag-o lang nako nahibaw-an nga mabdos ang usa ka babaye nga iyang na encounter few months ago. Ako siyang gi confront ani. Ako ug ang akong family nanga shock ani nga hitabo nga amo lang nahibaw-an sa Facebook kay nagyawyaw na ang babaye.

Nisulti siya nako nga one night stand ra to dala sa kahubog nilang magbarkada unya ang babaye, kuyog ra sa usa nila ka friend. Natripan ra kuno siya sa babaye nga maoy nag-una una niya. Nagduda pa gani siya nga maoy amahan.

Nahugno kaayo ko sa hitabo, Noy Kulas, kay buotan baya ning akong boyfriend. Ako ang iyang first GF kay tungod sa kapobrehon nila kaniadto, kayod ra ni siya sa trabaho. Pero sa nahitabo karon naglibog na ko kon mopadayon ba ko o di. Please I need your advice.

BON

Bon,

Usahay taas kaayo tag pagtan-aw sa usa ka tawo, butang o mga hitabo. We always expect nga maayo ang dagan, resulta ug uban pa, apan sa kalit lang, nahugno ang tanan. Mao ni ang nahitabo nimo kay taas kaayo ang imong pagtan-aw sa imong uyab, unya mao ni ang nahitabo. Apan kitang tanan dunay kahuyangan, dunay higayon nga di lang nato paabuton, kalit kitang matumba sa kalit lang nga bisan kita mismo, wa magdahom nga mahitabo.

Kon wa kadto mausbi ug dunay mga sirkumstansya sama sa nahubog siya nga maapekto sa paminsar, pasayloa siya. Apan kon siya man ang tinuod nga amahan sa gisabak nianang bayhana, let him support sa bata. Kon diskompyado siya, mahimo man nang ipa-DNA test later ang bata kon mahimugso na aron makaseguro siya.

Wa ko mag-ingon sa imoha nga di nimo siya buhian. Ang ako rang giingon pasayloa. Apan kay bag-o pa man ang hitabo, ayaw pagdali dali sa desisyon kay basin imo rang basulan sa kaulahian. Palabya ang igong panahon una ka pa modesisyon.

NOY KULAS