Every moment you touch me

Morag wa ko sa akong kaugalingon. Naglantaw man tuod ko sa lawod apan morag wa kini sa akong hunahuna. Wa sa akong hunahuna kon unsa ang akong gilantaw, ang mga baruto ba sa mga mananagat, o ang barko nga nagtadlas sa kadagatan nga nagpaingon sa Manila?

Nia ko ron sa lapad na namong reclamation sa Sogod, naglingod sa seawall nga nagtampi sa dagat. Hapit na mosawop ang adlaw. puwahon na man gani ang dagat nga naigo sa puwahon nga silaw sa sumasawop nga adlaw.

“Ingon ka ba lang ani kanunay, Lorena?”

Igo ko lang gipasiplatan si Syreel nga katapad ko sa paglingkod. Wa ko tagda ang iyang pagpakabana nako. Duna koy kaugalingong panghunahuna nga ako ra ang nakahibawo kon unsay angay kong buhaton, o di angay nga buhaton.

“You know, Lorena, wa ko makasabot kon kagustohan mo ba kining tanan, o biktima ka lang.”

Nakatan-aw ko sa kamot ni Syreel nga mikupot sa us ako ka kamot nga gipatong ko sa akong paa. Wa ko kuhaa ang akong kamot nga iyang gikuptan. Naanad na ko aning buhata ni Syreel. Wa man sab sa akong hunahuna nga hatagan ko kinig malisya.

Ambot lang kaha kang Syreel, kon duna ba siyay laing kahulogan sa pagkupot niya sa akong kamot. Kana ganing magkadungan mig gawas sa gate sa among gieskuwelahang university, magkuyog gyud mi sa paglakaw sa sidewalk paingon sa gipuy-an namong boarding house sa siyudad. Duol ra sa among gitunghaan ang tagsa-tagsa ka boarding house nga among gisak-an. Nagtapad lang kini.

Mao nga nagkasuod mig maayo. Daan na ming kaila sa among gipuy-an sa probinsiya, sixty kilometers away gikan sa siyudad.

“Wa man ka nako pugsa sa pag-unong sa akong kaguol, Syreel. Wa man koy labot sa imong kinabuhi, di ba?”

Hinay lang ang akong tingog. Sunday karon, ug hapon na. Naandan ko na ang pagsuroy sa reclamation sa maong oras kon nia ko sa among lungsod. Ug ambot ba sab, uy, nga magkaabot man mi si Syreel dinhi? Nagkaatol lang ba o mao gyuy among kapalaran?

“Giunongan tika sa imong kaguol, Lor, kay importante ka sa akong kinabuhi isip akong friend.”

Miginhawa na lang kog sagunson kay mihuot ang akong dughan.