Gisunog ang libro
KERNESTO D. LARIOSA San Fernando, Cebu
adaghanan na siya mohangyo sa iyang asawa, apan kanunay siyang balibaran kay kapoy kuno sa iyang trabaho nga puno sa “stress” kay “executive” lagi sa usa ka dakong banko sa Sugbo.
Iya lang gisabot. Matahom pa ang iyang asawa sa edad nga 40 anyos. Usa ra ang ilang anak nga tua sa Amerika magtrabaho isip nars. Gitawag siyag “cradle snatcher” sa iyang mga barkada kay 20 pa kini nga iyang gipangasawa nga campus beauty queen samtang siya mag-40.
Kinsa man say di mosugot niya nga usa ka bar topnotcher ug maayog agi sa panlaban. Daghan siyag kuwarta ug may awto nga mahalon. Tagaktak gud si Minda nga Miss University sa ilang tulonghaan. Daghan siyag mga karibal apan wa kadama kang Minda nga didto niya mipilit kay abogado ug may kaambong sad.
Sa lamisita nakabig ang iyang panan-aw sa libro nga nag-ulohag “Frigid Women.” Nakakita siya nga nagbasa ang iyang asawa niini. May sakit ang iyang asawa nga “frigidity” nga di na gustong makighilawas kay mokurog ni sa di kapugngang kahadlok? Mao kini ang sakit nga “frigidity” nga talagsaong motapot sa usa ka babaye.
Nakahinuktok si Atty. Fred Gervacio ug nagpanglingo sa gidangatan sa iyang asawa. Naluoy siya karon niini nga may “sexual abnormality” na diay. Bantog ra nga dugay nang wa pahilabot niya.
Nabuntagan siyang nagtuon sa usa ka celebrated case dihang miabot ang iyang asawa kay nakita niyang may kotseng mihunong duol sa ilang balay. Nananghid si Minda kaniya nga mag-overtime kay may tigom siya sa kaulohan ug gikinahanan ang report sa iyang departamento. Nailhan niya nga kotse ni George, ang batan-ong sakop sa iyang asawa nga kanunayng mohatod niini.
Mihapit paghawok niya ang iyang asawa. “Good morning, dear, nakapainit na ka?” Miyango siya kay bag-o pa niyang nahurot ang usa ka tasang kape. Nakita niya nga luya kaayo ang iyang asawa. Nakasabot siya kay nag-overtime man.
Nakadaog siya sa kaso nga plunder sa iyang amigong pulitiko. Dakong kantidad ang gibayad niya. Iyang gihangyo ang iyang asawa nga mamakasyon sila sa Amerika aron duawon sab ang ilang anak nga si Rose.
“Di ko kahimo, dear, kay busy kaayo ko sa akong trabaho, sa sunod na lang.” Nakasabot na sad siya kay i-promote man kini nga vice president sunod buwan. Siya na lang ang mibakasyon kay gimingaw na sad siya sa iyang anak.
Wa siya magtuo nga magkita sila sa Amerika ni Mercedes, ang uyab niya niadto. Matahom sad kini bisan may edad na. Wa siya magdahom nga makasala siya kang Minda kay nada niya sa motel si Mercedes kinsa wa pa maminyo.
“I curse myself, Mercedes, kay nakasala ko sa akong asawa.” mGitalikdan niya si Mercedes nga naghilak. “But I still love you, Fred.” Paapas kaniya sa babaye nga usa ka doktora nga nagtrabaho sa ospital nga gitrabahuan sa iyang anak.
Takulahaw lang nga nakadawat siyag long-distance call nagpahibawo nga nadisgrasya ug namatay si Minda. Uban ni Rose dali silang mingpauli sa Pilipinas.
Gisaysay sa suod niyang higala ang nahitabo. Wa siya makatuo. Manag-uyab diay sila Minda ug George dugay na! Tingali, nag-away kuno kini sila sud sa awto maong nahagbong kini didto sa lawom nga pangpang sa norte diin sila namakasyon sa usa ka luhong beach resort. Playboy kuno kaayo si George nga maoy hinungdan sa away. Nagpamaak siya sa ngabil sa pagbudhi sa iyang asawa. Wa niya pahibaw-a ang nagbangutang anak sa iyang nasayran. Nahibung kini nga iyang gisunog ang librong “Frigid Women” sa tugkaran. Maluibon ka, Minda! Di diay ka frigid. Giilad mo ako! Ka wa nimoy batasan babayhana ka! Singgit karon sa iyang kahiladman.