CEPCA A NAGHARI SA PESTAÑO CUP

Naangkon sa CEPCA A ang kampiyunato sa Cebu Executives and Professionals Chess Association (CEPCA) Boy Pestaño Memorial Open Chess Tournament nga nahuman sa miaging gabii sa Barracks Chess Club sa Robinsons Galleria Cebu.

Ang CEPCA A, nga gilangkuban nila ni NM Rogelio Enriquez Jr. sa board 1, NM Arnolito Cadiz sa board 2 ug Jong Melendez sa board 3, nakatigom og 16 match points gikan sa walo ka mga daog ug usa ka pilde human sa siyam ka rounds aron angkunon ang titulo.

Ang KKK 9 maoy nakaangkon sa ikaduhang dapit pinaagi sa ilang 14 match points gikan sa unom ka mga daog, duha ka mga tabla ug usa ka pilde.

Samtang ang ningkuha sa ikatulong dapit mao ang AIM Coop 9 nga naggunit sab og 14 match points.

Natanggong unta sa triple-tie sa 14 match points ang KK 9, AIM Coop 9 ug Toledo City apan pinaagi sa tie-break 2, naangkon sa KKK 9 ang ikaduhang puwesto, ikatulo ang AIM Coop 9 samtang ningdakin-as sa ikaupat nga luna ang Toledo City.

Isip kampiyon, ang CEPCA A nakabulsa og P25,000, nakabaton og P15,000 ang KKK 9, nakakuha og P10,000 ang Aim Coop 8 samtang nakaangkon og P5,000 ang Toledo City.

Nakadawat sab og ganting salapi ang ikalima hangtod sa ika-10 nga mga puwesto.

Ang presidente sa CEPCA nga si Engr. Jerry Maratas, malipayon sa dakong kalampusan sa torneyo nga gisuportahan sa Jemar Engineering Services, Celjem Construction and Development Corporation, Handuraw, Salon de Rose ug Hale Manna.

“Nalipay gyud kaayo ko sa turn out sa tournament. We only expect about 30 teams pero niabot man ta og 56 ka teams,” matod ni Maratas. “Daghan sab mga bata nga chess players ang ning-apil. Duol man ang atong kasingkasing aning mga bata kay sila man ang future.”

Nagpasalamat sab si Maratas sa mga ningsuporta sa torneyo, nga gipahinungod sa founding president sa CEPCA nga si anhing Boy Pestaño, kinsa usa ka chess columnist sa Sun.Star Cebu ug Superbalita.

Ang torneyo tipik sab sa ika-28 ka mga tuig nga anibersaryo sa CEPCA, ang labing dugay nga aktibong chess association sa Sugbo.

/ TAMPO NGA HULAGWAY ■ NAGHARI: Nagpahulagway ang mga sakop sa champion team CEPCA A (mga naggunit sa tropeyo) kauban ang mga nagpasiugda sa bag-uhay lang nahuman nga Cebu Executives and Professionals Chess Association (CEPCA) Boy Pestaño Memorial Open Chess Tournament. (L-R, atubangan) NM Rogelio Enriquez Jr., NM Arnold Cadiz, Atty. Jong Melendez, ug tournament director Jun Olis. (L-R, likod) Ruel Hortelano, Zarah Smith Pestaño, ug tournament chairman Engr. Jerry Maratas.