James wala mabalaka sa 0-2 nga pagsugod

Gitataw sa bag-ong lider sa Los Angeles Lakers nga si LeBron James nga wala ra siya nasagmuyo nga nasubhan sila og duha ka sunodsunod nga kapildihan sa 2018-19 National Basketball Association (NBA).

Alang sa four-time MVP, natural lang kini.

Human sila nabunyagan og 119-128 nga kapildihan sa ilang pag-asdang sa Portland Trailblazers, ang Lakers nakaangkon na sab og laing kapildihan sa ilaha mismong tugkaran batok sa Houston Rockets, 115-124, sa kombati nga gibulingan og karambola.

“I’m not disappointed at all,” matod ni James, kinsa mipirma og upat ka mga tuig nga kontrata sa Lakers nga nagbalor og $154 million.

“I understand that we’re going to have some struggles, some early struggles. And nobody said it was going to be easy.”

Gipasabot ni James nga wala siya nahibulong nga nakamugna sila og mga sipyat sa krusyal nga nga bahin sa miagi nilang duha ka mga duwa ug malaumon siyang maka-adjust ra sila niini sa pagdagan sa panahon.

Hinuon, sa kasinatian ni James, dili bag-o alang kaniya ang mga hudlat ug pressure ilabi na niadtong didto pa siya sa Cleveland Cavaliers ug sa Miami Heat.

Gilauman nga sa iyang presensiya mamaayo na ang dagan sa Lakers.

Karong adlawa, ang Lakers mamasin sa pagkaplag sa labing una nilang daog gikan sa pag-abot ni James sa ilang pagpakigbatok sa San Antonio Spurs.