Salamat kaninyo!
Ang Superbalita Cebu nisaulog sa iyang ika-24 nga anibersasryo kagahapon. Uban sa iyang kalamposan ug nagpadayong hagit sa kabag-ohan sa industriya, mapasalamaton kami sa inyong padayong pagmahal nga naghimo sa inyong gimahal nga mantalaan nga padayong numero uno sa rehiyon.
Usa ka yano apan makahuluganon nga kasaulogan pinaagi sa usa ka misa-pasalamat ni Fr. Cresencio Ubod sa Sto. Rosario Parish nga gipahigayon sa newsroom sa SunStar Bldg. sa P. del Rosario St. alas tres sa hapon. Nisunod ang yano nga salosalo.
Sa wali ni Fr. Ubod nga nakatutok bahin sa kalinaw nga nakasentro ni Kristo haom sa kasaulogan alang sa kahiusahan sa mga kawani ug pagdumala sa mantalaan. Ang tawo nga nagbaton sa kalinaw ni Kristo, matod ni Fr. Ubod, gaan ug hayahay sa pagtrabaho taliwala sa kadaghan sa buluhaton.
Kon way lama sa pagdumot sa kauban o isig-ka-tawo maoy matuod nga kalinaw. Mahimo kini sa pagpatay sa babag nga garbo ug ang pagbaton sa pagkamapahiubsanon. Kon maghari kini nga pamatasan sa buhatan, seguradong mas magmalambuon pa ang mantalaan.
Mao kini seguro ang usa sa mga sekreto kon nganong padayong nag-una ug numerong uno ang Superbalita Cebu - ang gugma sa kalinaw taliwala sa daghang hapit.
Karong adlawa, ang unang tikang ning mantalaan ngadto sa iyang ika-25 ka tuig o silver aniversary sa pagserbisyo sa publiko pinaagi sa iyang patas ug lab-as nga paghatod sa mga taho o kasayoran ug mga kalingawan.
Nasayod kita ang tradisyonal nga pamahayag natay-og karon sa pagtumaw sa social media tungod sa Internet. Usa kini sa laing dakong hagit sa kasaysayan sa industriya apan maayong opurtunidad sa paghatod sa mas paspas ug dekalidad nga serbisyo.
Salamat sa kaninyong tanan - mga bumabasa, advertisers ug news sources.