Every moment you touch me
Kinsa man say di maguol sa nahitabo nako, uy? Kapait gyud diay aning magpaturagas lang tag paundayon sa pinitik sa atong kasingkasing. Aw, tinuod man sab ang giingon nga kanunay uwahi ang pagbasol.
Husto si Syreel. Kagustohan ko ang tanan maong naingon ko ani ron. Kon nagpugong pa ko, aw, malipayon gihapon unta ko ron. Napadayon unta gihapon ko sa pagpangandoy nga sa umaabot nga mga adlaw, mahimo kong malampuson sa kurso nga akong gikuha. Apan di kini mahitabo. Kutob na lang karong semester ang akong pagtungha sa college.
Gani, next week na lang kutob ang among klase, ug semestral break na. Di na ko magpa-enroll para sa next semester.
“Oo, Syreel, kagustohan ko ang tanan. Nagpada’a ko sa akong dakong paghigugma kang Dante.”
Giumod ko ang akong nawong sa duha ko ka palad. Nakahilak na gyud ko.
“Pero this is not the end of the world, Lorena. You’re still young.”
“Bitaw pero duna nay mansa ang akong pagka babaye.”
Namahid ko sa akong mga luha sa gikuptan kong panyo. Unya gihapuhap ko ang dako kong tiyan. Eight months na ang baby nga akong gimabdos. Gipamabdosan ko ni Dante. Ambot hain na kaha ron siya. Wa ko na siya makita sa eskuwelahan. Wa na siya magpakita nako sukad nga iyang nahibaw-an nga mabdos ko. Di ko na sab siya makontak. Sure ko nga nag-ilis siyag simpak sa iyang selpon.
It means nga naglikay siya nako, nga di siya motubag sa iyang kaakohan nako. “Sige, Syreel, mopauli na ko.” Miginhawa kog lawom gyud kaayo ug unya mitindog ko. “Ihatod tika sa inyo, Lor.” Wa ko motubag. Milakaw ko. Diha sa akong tapad si Syreel. Iya kong gikuyogan sa akong pagpauli sa balay nga duol ra sab sa nahimutangan namong reclamation area.
Gipasulod ko si Syreel dihang nahiabot na mi. Gipalingkod ko siya sa sala. Wala sila si Mama ug Papa kay tua sa simbahan. Parehas silang nag-alagad sa among simbahan, ug duna silay miting karon. Nauwaw man gani ko nila sa akong pagmabdos kay nahatagan ko silag kauwawan. Apan relihiyuso ang akong mga ginikanan. Nakasabot sila sa akong sitwasyon.
Gikuptan na sab ni Syreel ang akong usa ka kamot.