Fajardo miapil na'g balik sa praktis sa SMB
Gitugtan na sa iyang mga doktor ang higanteng Sugbuanon nga si JuneMar Fajardo nga makaapil sa praktis sa San Miguel Beermen ug nalantawan nga makabalik na kini’g duwa sa Philippine Basketball Association (PBA) Governor’s Cup karong Sabado.
Ang pagbalik sa produkto sa University of Cebu (UC) Webmasters gikinahanglan sa Beermen hilabi na kay nagkaduol na ang quarter-finals.
Nagkanayon si San Miguel coach Leo Austria nga niadto pang Lunes gitugtan sa mga doktor si Fajardo nga makaapil sa ilang ensayo.
“We will see pagdating ng Saturday if he is ready to play. But definitely, before the eliminations is over, I think he could play,” matod ni Austria sa interbyu sa Spin.ph.
Nakasinati og angol si Fajardo sa iyang tiil sa miaging Commissioner’s Cup hinungdan nga wala kini nakapakita og aksyon sulod sa duha ka mga buwan.
Kagahapon, si Fajardo nisubay
sa shooting drills nga gihan-ay og tuyo sa Beermen alang sa lumad nga taga lungsod sa Pinamungajan, Cebu.
“He was given by the doctors the clearance to start strengthening and drills like shooting. By himself pa lang. Actually, nagpa-schedule ako ng two hours tomorrow for him,” dugang ni Austria.
Matod ni Austria nga naghinamhinam na si Fajardo nga makabalik og duwa.
“The good thing with him, upon learning na he is okay yesterday, derecho agad siya, nagbihis, at ginawa na niya ang dapat gawin,” pasabot ni Austria.
Naglaom si Austria nga makaapil na ang 6’10” nga magduduwa sa 5-on-5 nga kombati atol sa ilang praktis ugma.