1 PATAY, MASUSO GRABE, 2 ANGOL SA BANGGA
Patay ang usa ka ginang human mabanggai ang ilang gisakyang motorsiklo pasado alas 5:00 kagahapon sa kaadlawon sa South Coastal Road sa Barangay Mambaling, siyudad sa Sugbo.
Ang biktima giila nga si Abegail Uy, kinsa namatay diha-diha tungod sa kakusog sa pagka bangga kanila sa usa ka Mazda Bongo, nga adunay plate number AEB 7979 nga gi maneho ni Ronald Banga.
Matod ni Sr. Inspector Dexter Basirgo, hepe sa Traffic Police Group sa Cebu City Police Office (CCPO), nga ang motorsiklo nga gimaneho ni Joseph Balangegue uban sa iyang live-in partner nga si Uy nga nagkugos sa duha ka buwan nga masuso, padung na mopauli sa syudad sa Talisay.
Apan kalit lang naabot sa ilang luyo ang Mazda Bongo nga maoy nidumbol kanila hinungdan nga si Uy nga wa maka helmet nalagpot ug napantok ang ulo sa simento.
Nasikop hinuon sa mga traffic police si Banga ug niangkon sa iyang salaod nga nahimo kay matod niini kalit kaayo ang hitabo.
“Kusog kaayo nakapadagan ning driver sa Bongo kay na drag pa man ang motor. Nag una ang motor, nya niingon ning driver nga kalit daw kaayo ang hitabo,” matod ni Basirgo.
Anaa pa karon sa tambalanan ang amahan ug anak nga padayon pangagiobserbahan sa mga doktor, ilabi na ang masuso nga duha ka buwan.
KARAMBOLA
Samtang nakamugna og ka huot sa dagan sa trapiko sa South Coastal Road ang karambola sa lima ka mga sakyanan sa SRP tunnel habig na sa barangay San Roque, sIyudad sa Sugbo pasado alas 5 sa milabayng hapon.
Matod ni Sr. Inspector Joemar Pomarejos, hepe sa Waterfront police station, nga samtang nagdagan ang daghang mga sakyanan sa SRP tunnel paingon sa norte nga bahin sa syudad sa Sugbo, ang delivery truck nga gimaneho ni Gary Panilago, 35, taga Tinaan, siyudad sa Naga, nidumbol sa mga sakyanan nga nag hunong tungod sa traffic.
Rason sa maong driver nga niungot ang iyang brake sa dihang gitamakan na unta niya hangtod nga di na madalag liwag, nidiretso kini sa mga sakyanan nga naa sa unahan.
Tungod sa kusog nga pagka bangga, nadanyos ang mga sakyanan sama sa Toyota hilux sa Department of Public Works and Highways (DPWH) nga gimaneho ni Arnel Ibon, 31, taga Pulpogan,Consolacion.
Lakip na ang Toyota Vios nga gimaneho ni James Patrick Coma, 22, taga San Remegio, Cebu; Wilber Noynay, 28, aga Bagong Dan, lungsod sa Liloan nga maoy driver sa Isuzu Elf nga gipanag iya sa Al Jem Cargo Forwarder ug ang Isuzu delivery truck nga gipanag-iya sa Metro Rental Stores nga gi maneho ni Arnel Erato, 40, nga taga Poblacion, Compostela.
Nadala sa tambalanan si Noynay nga maoy na grabehan sa panag bangga samtang luwas usab ang ubang driver niini lakip ang mga pasahero.
Si Panilago ang gitanggong na sa Waterfront police station samtang giandam na ang kasong reckless imprudence resulting in physical injuries and damage to property.
Tungod sa kadugay nakuha ang mga sakyanan nga nagkabangga nakamugnag kahuot sa trapiko sa SRP kadtong nipaingon sa norte nga bahin sa syudad.