2 KA LALAKE GIPANGTIPI
BAG-ONG NAKAGAWAS SA PRISUHAN: PULIS
Duha ka gikatahapang mga karnaper, drug pushers ug tulisan, gipatay sa mingaw nga dapit sa Barangay Campo 8, dakbayan sa Toledo kagahapon sa alas 5:30 sa buntag.
Ang duha bag-o lang nadakpan sa kapulisan sa Talisay City kay nangarnap og motorsiklo sa Lapu-Lapu City, apan nakagawas sa prisohan kay nisibog ang biktima.
Mga patay nga lawas nila ni Joniel Abatayo, 29, taga Brgy. Lagtang Talisay ug kauban nga si Abelardo Salomag, 44, napalgang nagdulog nga nagbuy-od daplin sa karsada.
Ang duha dunay mga samad pinusilan sa ulo ug lawas gikan sa kalibre .45 nga pistola ug 9mm pistol base sa mga kabhang.
Si Supt. Randy Korret, hepe sa Toledo Police Station nga nahinabi sa Superbalita Cebu, nibutyag nga mga motorista nga nangagi sa maong dapit maoy nakakita sa mga biktima nga naglut-od sa daplin sa karsada nga naglunang sa dugo.
Gipahibawo sila sa mga opisyal sa barangay ug ilang naabatan ang mga biktima nga nagdulog sa ilang dugo. Ilang nakaplagan sa crime
scene ang unom ka mga kabhang sa bala.
Way nakakita sa panghitabo sanglit awaaw ang dapit ug dunay daghang mga kahoy ug layo ang mga balay.
Si Korret niingon nga sa ilang background check sa mga biktima, nadakpan sila sa kasong carnapping sa kapulisan sa Talisay human dunay biktimang nawad-an sa motorsiklo sa dakbayan sa Lapu-Lapu.
Nagtuo si Korret nga gidala sila si Abatayo ug Salomag sa dapit ug gipatay sa posibling gikaaway niini.
Nakig-alayon na sila sa kapulisan sa dakbayan sa Talisay ingon man sa Lapu-Lapu alang sa dugang kasayuran sa ubang detalye sa pagkatawo sa mga biktima.
Ang mga biktima giiila ug gi-claim sa ilang mga kabanay kagahapon sa buntag.
‘TulISan, puSHER’
Si Chief Insp. Ardiolito Cabagnot, deputy chief sa Talisay Police Station nga nahinabi sa Superbalita Cebu, nibutyag nga sila si Abatayo ug Salomag mga notadong karnaper, tulisan ug drug pusher.
Ang duha dunay mga taguanan sa Mananga, Barangay Tabunok, Talisay.
Sumala pa niya nga si Abatayo maoy tigkarnap sa motorsiklo samtang si Salomag, maoy tig chop-chop ug mo-dispose sa ilang mga kinawat.
Ang duha nadakpan nila sa milabayng adlaw human ang biktima nga taga Lapu-Lapu nagpatabang sa Station 5 sa LLCPO.
Na-track sa tag-iya ang motorsiklo pinaagi sa gibutang nga (GPS) nga naa sa Tabunok hinungdan nga ang taga Station sa LLCPO ni-coordinate kaniya.
Nasikop sa Talisay police ang mga suspek.
Gi-turnover nila sa LLCPO Station 5 ang duha sanglit didto nila nahimo ang krimen sa Lapu-Lapu City.
Apan nahibaw-an nila nga ang biktima ug mga suspek nagkasabot nga di ipadayon ang kaso niadtong Miyerkulis sa buntag hinungdan nga nakagawas sila sa prisohan.
Sa ilang nahibaw-an, ang biktima wa nay interest nga mosang-at sa kaso batok nila ni Abatayo ug Salomag kay nabawi ang iyang motorsiklo.
Gikatahong nahadlok ang bktima sanglit ang mga suspek dunay daghang records sa patay ug ubang krimen.
Si Cabagnot nibutyag nga si Abatayo, gawas sa pagkatulisan, karnaper, pusher, usa sab kini ka hitman sama kang Salomag.
Nagtuo sila nga ang mga karnaper giunay sa ilang mga kauban sa kabalaka nga gipangtug-an na sila sa ilang kalihukan. /