Mga dalagita naluwas sa PWC gikan sa langyaw
mga menordeedad nga babaye ang gihaylo og iphone nga cellphone bugti sa lawasnong kalipay sa langyaw, ang naluwas sa kapulisan sa dakbayan sa Talisay uban sa provincial Women’s Commission (PWC).
Ang nasikop nga langyaw mao si Stephen De Groot, 52, lumad nga taga Netherlands, apan kasamtangang nagpuyo sa usa ka subdivision sa Barangay Mohon, sa samang siyudad.
Gibutyag ni Chief Insp. Ardiolito Cabagnot, deputy chief sa Talisay Police Station, nga kasong qualified trafficking ug lugos ang ilang gipasaka sa Cebu Provincial Prosecutors’ Office kagahapon.
Matod niya, ang modus ni De Groot nga hayluon niini og mahalong mga cellphone ang mga menor-de-edad nga mga babaye nga iyang magustoan bugti sa iyang pakighilawas.
“Kining foreigner hilig ni og mga batan-on, kana ganing 16 tiguwang na para niya,” sigon ni Cabagnot dihang nahinabi sa Superbalita Cebu.
Upat ka mga batan-ong mga babaye ang iyang gipakaon ug gikuhaan og hulagway ug gipanghambogan sa iyang iPhone nga cellphone.
Gisaysay ni Bise Gobernador Agnes Magpale, co-chair sa PWC, nga ang mga bataa nagsugod mag-adtuan sa balay sa langyaw kay tagaan og kwarta o regalo.
“Murag naanad intawon ang mga bata but this time na-alarm na kay gipahubo na sila,” dugang ni Magpale.
Niadtong Miyerkules sa gabii, nibalik ang duha ka menor nga babaye ug giingong gipahimuslan ang ilang pagkababaye sa langyaw.