Primary health care services unahon karon sa DOH

Usa ka health stations sa matag barangay nga aduna’y populasyon nga 5,000 ug usa ka rural health sa matag 20,000 nga populasyon, mao kini ang target sa Department of Health kon hingpit na nga mapasar kini Universal Health Care alang sa tanang Filipino.

Matod ni Health Secretary Francisco Duque nga ang pagpalambo pa sa primary health care services ang usa sa prayoridad sa DOH kon mamahimo na nga balaod ang UHC.

Adunay itagana nga P240 Bilyones ang DOH sa unang tuig sa pagpatuman niining UHC sa nasod aron mahug nga maminusan ang gasto ngadto sa wa nay bayad ang pagkuha sa serbisyo alang sa panglawas sa matag Pinoy.

Gibutyag usab ni Duque sa tigbalita kagahapon nga sa pagkakaron aduna lay 52 porsiyento sa gikinahanglan lukop nasod ang adunay barangay health stations, rural/ city health units.

Ug ang nahabiling 48 porsiyento mao ang plano nila nga hatagan og basic delivery unit.

“The problem here is when you don’t have the basic delivery downstream, ang nagyayari mga tao even for mild health issues, they all ran to the hospital, even normal na panganganak punta sa hospital imbes na pwede gawin dun sa lying in clinics,” matod ni Duque.

Nakita nila sa DOH nga ang labing huyang nga parte sa Philippine health system kining primary health nga unta adunay sakit nga di na kinahanglan nga dalhon sa hospital o kaha grabe na kini hinungdan nga uwahi na dihang gidala kini sa tambalanan.

“The primary health care really is the major building block of the universal health care,” dugang ni Duque.

Gikan sa kasamtangan nga ratio nga usa ka hospital bed ngadto sa 1,200 ka tawo, himuon usab kini nila nga usa ka bed ngadto sa 800 ka tawo.

Gihuwat na ang bicameral conference sa Senate ug sa House of Representatives karong buwan sa Nobiyembre aron hingpit nang mapasar kining UHC.

Gibutyag usab ni Duque nga adunay budget alang niini apan dili pa igo.

Usa sa kuhaan nga budget niini gikan sa sin tax ug sa Trabaho Bill o ang Train 2.

Anaa sa Sugbo si Duque alang sa Health Sector Reform Agenda and Service Delivery Network and other health essential services forum.