JO sa Mandaue nasakpang mipeke sa business permit

Kagamhanan sa dakbayan sa Mandaue mopasaka og kasong kriminal batok sa usa ka usa ka job order employee nga na-assign sa Business Processing Licensing Office (BPLO) human nasuta nga nang-falsify og business permit.

Gisusi pa usab karon sa City Legal Office kon kunus-a pa kini nagsugod sa maong ilegal nga transaksyon ug kon aduna pa bay laing nalambigit nga mga kawani.

Kasong’ kriminal nga falsification of documents ang gikatakdang isang-at sa kagamhanan sa dakbayan sa mandaue pinaagi ni Atty. Danilo Almendras, ang City administrator batok sa usa ka 45 anyos nga J.O. sa Mandaue City hall.

Wa una hinganli sa City legal office ang maong kawani, hangtud nga hingpit na mapasaka ang kaso.

Gitug-an ni Atty. James Allan Sayson sa city legal office, nga nagsugod ang gihimo nilang pakisusi sa niaging semana, human usa sa mga tag-iya sa luna sa pito ka mga balay patigayon sa may dan A.S. Fortuna ang giingong nag-operate bisan kon gipasirad-an na.

Sa pagsusi, 3 ngadto sa 4, ilang nasuta nga gi-doktor ang business permit, bisan gamit niini ang papel gyud alang sa maong permit.

Ug Myerkules lang, usa ka business owner sa brgy. Subangdaku ang gipatawag sa BPLO kay gi-kwestyon kon nganong nakakuha kini’g permit, nga wa man ka-comply og Environmental Compliance Certificate ug sanitary permit.

Sa pagpakita sa tag-iya sa iyang business permit, didto nakita ang pirma sa maong J.O. nga maoy ni-release, imbes nga ilang pangu nga si Rebecca Luna.

“Now gibuhat sa head sa bplo, niadto siya sa I.T. because we have a system that we will see all the activities sa govt. Computers. Na-trace nato nga the permit nga gi-falsify was created on that day (July 2, 2018) at 9:55 am, it could reflect on the permit nga it was created 9:55am, at 9:57 the same user name and password, gi-delete ang business permit. So if you check the permit now, it is not existing,” dugang pasabot ni Sayson.

Ang kawani ang giingong wa na nitunga sa buhatan sugod Myerkules sa hapon hangtud kagahapon, gipatawag unta kini sa city legal aron sa pagpaklaro sa maong kaso.

Hinungdan nga mohimo pa’g law’m nga imbestigasyon ang City legal office, human usab sa mando ni Mayor Luigi Quisumbing, pagsusi kon aduna pa bay laing kawani ang nihimo sa ingon, ug kon may kalambigitan ba ang mga business owner o wala.

dugang ni sayson nga ila kining gipahibawo karon aron magsilbing warning di lang sa mga kawani sa BPLO, apan lakip na sa ubang buhatan sa Mandaue City hall.

Giawhag usab nila ang mga business owners sa pagsusi sa ilang mga permit kon tinuoray kini anaa sa record sa city hall.

To all the transacting citizens in Mandaue City, we will not tolerate red tape or shortcuts. We will also look at, if they (business owner) were in conspiracy with our personnel..” - Atty. James Allan Sayson, City Legal Office