Pagbasa sa kaso ni Boniel giuswag

Pagbasa sa kaso ug pre-trial sa kasong kidnapping ug serious illegal detention batok nila ni kanhi Bohol Provincial Board Member Niño Rey Boniel, Wilfredo Hoylar ug Restituto Magoncia Jr. giuswag.

Human niduso og motion for reconsideration sa gi-deny na nga motion to quash information, kalabot sa maong kaso, ang ilang kampo.

Imbes nga kagahapon sa buntag, gi-reset kini ngadto sa Nobyembre 15.

Gihatagan ang prosekusyon sa pagtubag sa motion for reconsideration hangtod sa Oktubre 31. Nitunga kagahapon sila si Boniel, Hoylar ug Magoncia Jr. lakip na ang complainant nga si Angela Leyson, ang bestfriend sa kanhi Buen Unido mayor ug asawa ni Boniel, nga si Gisela.

Si Leyson ang nipasaka sa serious illegal detention.

Samtang, niduso usab og gag order ang kampo nila Atty. Amando Virgil Ligutan batok sa mga abogado sa kampo ni Boniel kinsa giingong maoy mopasangil pinaagi sa media nga ang prosekusyon ang naglangaylangay sa kaso.

Samtang mapasalamaton na ang prosekyusyon nga niadtong Miyerkules gi-grant sa korte nga mahimong state witnees ang ig-agaw ni board member nga si Riolito Boniel ug Randel Lumapas kinsa nitug-an nga ang board member gyud ang nipatay ug nihug ngadto sa lawom nga bahin sa kadagatan, sa iyang asawa.

Karong ala 1:30 sa hapon ipadayon ang pagdungog sa Parricide case sa RTC sa Lapulapu City.