Di baya bulay-og

Duha na usab ka mga tawo ang napalgang patay, gituohang mga biktima sa summary execution, sa daplin sa karsada sa Toledo City. Sa imbestigasyon sa kapulisan, nitumaw nga ang duha gikatahapang mga karnaper nga taga Lagtang, dakbayan sa Talisay. Ang duha dunay mga samad pinusilan, mao nga nagtuo ang mga imbestigador nga mga biktima sila sa summary execution.

Dul-an na sa 200 ka mga tawo ang nangamatay dinhi sa Sugbo sukad niadtong Hunyo. Sa di pa matapos kining tuiga, molapas kini og 200.

Kadaghanan sa mga kaso nga way labot ang police legitimate operations, wa masulbad sa kapulisan. Ang linya sa mga pulis kasagaran nagtutok sa posibleng motibo, wa magsubay kon kinsa ang mga nagpatay. Sa ilang general statements, itumbok dayon ang background sa mga biktima ug motibo. Apan kon si kinsa, way masulti ang kapulisan ug wa moirog ang kaso kay way klaro ang imbestigasyon.

Naa pay mga taho nga ang mga kabanay wa na mokooperar sa kapulisan tungod sa grabeng mga hulga nga ilang nadawat. Ilang gipalabi ang pagpakahilom tungod sa tumang kahadlok.

Taliwa sa pagpasigarbo ni Police Regional Office Director Debold Sinas sa ilang performance, di angay magmaya ang kinatibuk-ang han-ay sa kapulisan tungod sa kadaghan sa mga kaso sa pagpatay nga wa masulbad. Sila pa gani ang gidudahan nga nagpaluyo ning tanan.

Mahimong pagpahumot ni Sinas ngadto sa publiko ang mao nga taho kalabot sa ilang performance, apan wa makapapas sa pagduda sa publiko nga ang kapulisan nagpaluyo ug nasayod kinsa kining mga mamumuno ug nga kining ilang giingong imbestigasyon muro-muro lang.

Kon gusto pa silang mosulbad niining mao nga mga kaso, duna na untay nailhang killers. Di baya ni sila bulay-og kay way pulis nga wa mabansay ug makatungha og crime investigation.