Inday Sara way inpluwensiya
Si Davao City Mayor og presidential daughter Sara Duterte-Carpio miklaro nga wala siyay gidapigan sa duha ka mga kandidato pagka-gobernador sa lalawigan sa Sugbo sa sunod tuig nga eleksiyon. Sila ni third district Congresswan Gwendolyn Garcia ug Vice Governor Agnes Magpale ang magtigi sa pagka-gobernador.
Atol sa iyang pagbisita dinhi sa Sugbo karong bag-o, gibutyag ni Inday Sara nga “free zone” o zona libre ang Cebu. Buot ipasabot nga siya personal ug ang iyang Hugpong ng Pagbabago, usa ka regional party, dili mo-endorse og kandidato. Matod pa niya nga dako silag pasalamat sa mga Garcia kay mao ray misuporta sa iyang amahan nga si Presidente Rodrigo Duterte sa dihang milansar kini niadtong 2016 elections ug nakakuha og daghang boto.
Dili usab siya makabiya kang Magpale gumikan kay distant relative sa mga Duterte. Makalibog man ning baruganan ni Inday Sara. Kon dili siya maka-suporta ni Magpale nganong miuyon man siya nga molansar kini sa pagka-gobernador? Sa wala pa mo-file sa iyang certificate of candidacy (COC), niadto si Magpale sa Davao City ug nakigkita kang Inday Sara. Ug si Inday Sara ang misugyot sa Magpale-Davide tandem hinungdan nga mi-slide down si Junjun Davide sa pagka-bise na lang.
Kon misuporta pa usab si Inday Sara ni Magpale nganong midagan man ang iyang iyaan nga si Eleonor pagka-mayor sa Danao City batok ni Mayor Nito Durano nga paryente sa mga Magpale? Unya adunay usa ka Red Duterte nga milansar pagka Provincia Board sa fifth district batok sa anak ni Magpale nga si Miguel.
Pero para nako dili man kaayo impluwensiyado si Inday Sara dinhi sa Sugbo nga makapadaog sa iyang i-endorso nga kandidato. Wala man gani siya tanto mailhi dinhi. Busa dili angayan mabalaka ang mga kandidato nga dili niya suportahan. Bisan kon ang Presidente pa mismo ang mo-endorso.
Hinuon, advantage sa kandidato nga i-endorso sa Presidente pero dili kini garantiya nga modaog gyud. Pagkadaghan sa mga local candidates nga gi-endorso og Presidente apan pilde man gihapon. Kayod gyud sa pagpangampaniya, publisidad ug pinalitay sa boto maoy siguradong pamaagi sa kadaugan.
(bobbygnalzaro@gmail.com)