Zona libre sa Sugbo, makahimuot
Gideklarar ni Davao City Mayor Sara Dutete-Carpio, pangulo sa Hugpong ng Pagbabago (HNP) regional party ug anak ni Presidente Rodrigo Duterte, nga usa ka zona libre ang Sugbo sa eleksyon sa pagkagobernador sa sunod tuig.
Ang buot ipasabot niini mao nga patas ang bugnong lugaynon tali ni Bise Gobernador Agnes Magpale nga maoy nidagan sa pagkagobernador ug ni Cebu 3th district Rep. Gwendolyn Garcia, usa ka kanhi gobernador nga gustong mangulo pagbalik sa Kapitolyo.
Di manghilabot si Mayor Sara sa eleksyon sa pagkagobernador sa lalawigan sa Sugbo. Ang tanan iyang gitugyan ngadto sa mga Sugbuanon, sa mga botante, nga maoy mopili sa ilang gobernador.
Si Bise Gobernador Magpale paryente ni Mayor Sara samtang si Kongresista Garcia suod nga higala sa mga Duterte kay nisuporta siya ug ang mga Garcia sa kandidatura ni Presidente Duterte sa miaging presidential election.
Namahayag si Magpale nga daan nang niingon si Mayor Sara nga dili kini manghilabot sa politika sa Sugbo tungod kay gubot kini. Way paboran ang anak sa presidente sa duha ka mga kandidato. Ang makapahimuot kay iyang gisuportahan ang duha.
Sa iyang pagbisita dinhi sa Sugbo niadtong Lunes, si Mayor Sara niingon, “We are helping everybody who are helping the administration of President Duterte. Naa ko diri sa inyoha karong buntaga para mangampanya ko kang former governor Gwen Garcia. Unyang hapon, igtungtong nako sa ilang stage, moingon ko nga naa ko dinhi sa inyong atubangan kay mangampanya ko para kang Vice Gov. Agnes Magpale.”
Gihangop ni Magpale ug ni Garcia ang pamahayag ni Mayor Sara nga neutral siya sa eleksyon sa pagkagobernador sa Sugbo. Ang kuyaw kay parehong gisuportahan ni Mayor Sara silang duha si Magpale ug si Garcia. Magtabla unya ni silang duha sa eleksyon sa sunod tuig.
Apan kinsa kaha ang makapabor niini? Sa pagdeklarar ni Mayor Sara nga neutral siya, way gidapigan, mawagtang sab kaha ang giingon nga “pressure” ngadto sa mga dumadapig ni Gobernador Junjun Davide?
Ang mga botante maoy pagbut-on kay usa ra may modaog. Matod pas akong higala, way lingkoranan sa Kapitolyo alang sa number 2 sa eleksyon pagkagobernador.