Mga kalingawan karong Kalagkalag

Sa sunod semana na ang gitawag og Kalagkalag. Atol kini sa pagsaulog sa Adlaw sa mga Santos ug Adlaw sa mga Kalag.

Ang Gaisano Main ug mga sanga niini sama sa Country Mall, Balamban, Bogo ug Moalboal modalit sa Trick or Treat alang sa mga bata sa Okt. 31. Atol kini sa pagpahigayon sa Halloween Sale sa nahisgutang mga tindahan sugod sa Okt. 30 hangtud Nob. 2.

Sa Okt. 31, ipahigayon ang paglunsad sa ‘A Million Thanks’ Raffle Promo diin tulo ka mga Mazda3 Skyactiv ang bolahon. Ang ambongang artista nga si Mark Neuman ang celebrity guest ni Maam Rosemarie Gaisano sa programa sa parking area sa Gaisano Country Mall sugod sa alas 7s.g.

Sa pagpili sa Binibining Cebu 2018, wa ko makasaksi sa tigi sa swimsuit ug evening gown mao nga ako gyung giseguro nga naa ko inig korona sa Binibining Cebu 2018.

Na-obserbahan dayon nako ang wa pagtuman sa gipahibalo nga oras sa pagsugod sa programa. Gani duha gyud ka oras ang kalangan sa pagsugod. Hinaut nga di na kini mausab sa sunod higayon kay makakunhod sa kahinam.

Nakadayeg ko sa nindot nga mga konsepto nga giapil sa programa. Dunay uban niini nga mao pa nako makita sa susamang mga bangga sa kaanyag.

Ang nakaparat lang kay wa ma-sustain ang dagan sa programa. Hinoon maayong pagkadala sa mga hosts nga sila si KC Montero ug ang kanhi Ms. Earth nga si Karla Henry.

Nindot sab ang duha ka gowns nga gisul-ob ni Karla. Wa dungana uy! Ang-ang no?

Mga pahalipay sa mga nidaug: Steffi Pearson Aberasturi (Mandaue City), Bb. Cebu 2018; Kim Covert (Alegria), Bb. Cebu Tourism ’18; Tracy Maureen Perez (Madridejos), Bb. Cebu Charity ’18; Lou Dominique (Ronda), Bb. Cebu Heritage ’18; ug, Isabela Deutsch (Borbon), Bb. Cebu Ecology ’18.

Tungod kay abli ang bangga bisan niadtong mga nakaapil nag mga nasudnong bangga sa kaanyag ug sa mga single moms, daghan ang mga early favorites nga wa makarga.

Ingon anà man gyud ang posibilidad kon moapil kag bangga: daug o pilde.

Ako gyud nga giatangan ang tinuig nga bangga sa programang It’s Showtime nga Magpasikat diin magtigi ang lima ka grupo nga gipangulohan sa tagduha ka mga hosts sa programa.

Nakita nako ang pasundayag nila ni Jhugs ug Teddy, Vice Ganda ug Amy Perez, Anne Curtis ug Mariel Padilla, ug Vhong Navarro ug Ryan Bang. Tungod kay nibiyahe pa ko padulong sa syudad aron motan-aw sa Bb. Cebu, wa na ko makatan-aw sa pasundayag nila ni Karyl ug Jhong Hilario.

Ang nakaparat kay ang ilang pasundayag ni Karyl ug Jhong ang nidaug. Pastilan. Ang youTube na lang gyud intawn ang kadangpan. Maayo na lang!