Every moment you touch me

Miduko ko. Gipamatyag ko ang pinitik sa akong kasingkasing. Nagtan-aw ko sa kamot ni Syreel nga nagkupot sa usa ko ka kamot. Ambot ba sab aning tawhana, uy, nga morag dali ra man kaayong mo-touch nako? Wa man sab nuon nako kini ikasuko. Morag kabahin na kini sa akong kinabuhi kay naanad na man lang gyud ko ani.

Unsa kahay naa sa hunahuna ni Syreel, no, sa matag higayon nga kuptan niya ang akong kamot? Intentional ba kaha kini para niya, o usa lang ka friendly touch para niya?

Ug ako, nganong nalain na man ang akong gihunahuna ani karon? Wa man kini nako lainag sabot kaniadto?

“Nag-ingon si Mama ug Papa mo nako, Lor, nga di ka na mopadayog eskuwela. Tinuod ba nga nawad-an ka nag interes sa paghuman sa gikuha mong kurso.?”

Wa na magkupot si Syreel sa akong kamot niadtong tungora. Mitan-aw ko sa layo, morag di ko makatan-aw og diretso kang Syreel. Na, nalain na gyud ang akong paghunahuna sa kanunay niyang pag-touch nako.

“Naa na man koy anak, Syreel. Siya na lang ang tagaan kog atensiyon.”

Bisag ako wa ganahi sa akong gitubag kay sa pagkatinuod gusto gyud kong mopadayog tungha. Apan nauwaw ko sa akong parents nga bisan pa sa paghatag kog kauwawan nila nagmahal gihapon nako sa tinud-anay.

“Naa may yaya sa bata. Gituyo gyud siya pagkuha sa imong mga ginikanan aron dunay mobantay ni Baby boy kon moeskuwela ka na. Ayaw usiki ang laing paghatag og pagsalig sa imong parents nimo, Lor. Don’t forget nga ang milabay, milabay na. We should to move on bisan unsa pa kasakit ang atong naagian for the sake of our future. Labi na gyud nimo nga duna nay anak. Nagkinahanglan si Baby Boy sa imong pagtabang sa umaabot nga panahon. Mahimo lang nimo kini kon duna kay maayong trabaho.”

Nakatan-aw kog dugay kang Syreel. Puwerte niyang seryusoha. Sa akong pagsabot, naggikan gyud sa iyang kasingkasing ang iyang gisulti. Nakaginhawa ko ug nabatyagan ko nga miluag ang akong dughan. Naka-smile ko.

“Salamat sa imong pagtambag nako, Syreel. Morag husto ka, da”

Mipahiyoman na si Syreel. Klaro nga nalipay kaayo siya sa akong gisulti. (SUMPAYAN)