UV JRS. KAGING SA BABY WEBS SA G#1

Gipakaging sa University of Cebu (UC) Baby Webmasters ang defending champion University of the Visayas (UV) Baby Lancers sa Game One, 88-84, sa ilang best-ofthree finals sa Cebu Schools Athletic Foundation, Inc. (Cesafi) high school division niadtong Miyerkues sa gabii sa Cebu Coliseum.

Ang Baby Lancers nga perming naghupot sa bintaha gikan sa sinugdanan ug gani nakaposte pa kini og kapin sa 10 puntos, sa kalit lang miawop ang ilang opensa nga nagsugod sa katapusang dos minutos sa duwa.

Nabiyaan, 82-84, si Jasper Pacana maoy miduslit sa rally sa Webmasters sa himatyong mga segundos sa dihang, atubangan sa nagdepensa, mipabuto kini og tres sa wala nga bahin, nga maoy naghatag kanila og 85-84 nga labaw.

Kini gisundan usab dayon sa fastbreak ni James Basallo, 87-84, sa dihang nasipyat si Joshua Yerro sa Baby Lancers sa iyang lusot 55.6 segundos ang nahabilin nga naghatag og naghatag og kasiguroan sa ilang kadaugan.

Si Pacana mitapos sa duwa nga may 17 puntos, tulo ka rebounds, miabag usab og 13 si Jerick Ranido samtang ang anak ni Dondon Hontiveros nga si Ice Blanco, mitapos sa duwa nga may 11 puntos ug pito ka rebounds.

“Dominado gyud nila ang duwa kay dagko man sila (Baby Lancers) unya lupigon gyud mi sa fastbreak. Nag-adjust mi sa dying minutes, nag matchup mi ug maayo usab kaayong misanong ang mga bata,” matod ni UC coach Brod Samonte.

Ang ikaduhang free throw ni Blanco maoy miselyo sa kadaugan human sa sipyat ni Gabriel Cometa sa iyang threepoint attempt.

Si pildirong Lancers, si Cometa mipahagsa og 22 puntos, samtang si Yerro milabtik og 15.

Mosuway ang Baby Webmasters sa paglabni sa kampiyonato sa Game 2 nga ipahigayon karong hapon.