PBA: Magnolia, Alaska manuktok sa Top Four
Importanting nga panagengkuwentro ang gipaabot nga masaksihan karong gabii sa dihang magtakos ang Magnoli Pambansang Manok ug TNT Katropa alang sa quarterfinals round sa PBA Governor’s Cup sa Ynares Sports Center sa Antipolo.
Ang duha pulos adunay managlahing katuyoan ning maong panag-engkuwentro nga sugdan sa alas 7 sa gabii ning naghinapos na nga mga duwa sa elimination phase diin ang pagpanikaysikay og luna maoy nakulit sa ilang alimpatakan.
Target sa Hotshots ang ilang ikawalo nga daog nga maghatag kanila og kasiguroan sa Top Four samtang ang TNT mopunting usab sa ilang ikalima nga daog nga makagarantiya kanila og lingkuranan sa playoffs alang sa quarterfinals.
Lisod nga mga dalan ang atubangon sa KaTropa sanglit human ning ilang pagpakigkombati sa Hotshots ang laing babag sa ilang sunod nga lakang mao man ang two-time GovernorS’ Cup champion Barangay Ginebra.
Sa 4-5 nga baraha, ang Texters makig-ilogay sa katapusang tulo ka puwesto batok sa San Miguel Beer (5-4), NLEX Road Warriors (4-5) ug sa Meralco Bolts (4-6).
Sa preliminary action, ang Alaska Aces pormal nga mosulod sa top four slot batok sa naghingutas nga NLEX Warriors sa alas 4:30 ang takna sa kahaponon.
Samtang layo ra sa peligruso ang Aces, ang Road Warriors gipaabot nga mopahugot sa ilang panikaysikay aron makalabni og yawe nga moabli kanila alang sa sunod round.
Sa samang higayon, ang pagputol sa tulo ka sunodsunod nga kapildihan maoy laing katuyoan ni national team coach Yeng Guiao.
Hinuon ang kapildihan sa Alaska, dili tantong makaapekto sa ilang pagsulod sa sunod round ug gani aduna pay dakong kahigayonan nga makuha nila ang ilang target sanglit ang na-eliminate na nga NortPort ang ilang masangka sa Dominggo.
Apan alang ni coach Alex Compton di gihapon sila molugak batok sa NLEX.