P7.5-M NGA UKAY-UKAY
5 CONTAINER VANS GIABLIHAN SA BOC, IDONAR SA DSWD 7
■BUKID SA UKAY-UKAY. Si Atty. Elvira Cruz (wala), district collector sa Bureau of Customs (BOC) sa Port of Cebu uban sa laing mga opisyal ang ningkatkat sa bukid sa ukay-ukay. Kini ipangdonar tanan sa Department of Social Welfare and Development (DSWD), subay sa mando ni Presidente Rodrigo Duterte.
Mga ukay-ukay nga nasakmit niadtong 2014 ug 2017 nga nagkantidad og P7.5 milyones ang giablihan sa Bureau of Customs (BOC) sa Port of Cebu kagahapon aron i-donate sa Department of Social Welfare and Development (DSWD) 7.
Ang mga ukay-ukay nga nasakmit nga gi-import sulod sa lima ka mga container vans giisip nga ilegal ubos sa
Repulic Act 4563 kun “an act to safeguard the health of the people and maintain the dignity of the nation by declaring it a national policy to prohibit the commercial importation of textile articles commonly known as used clothing and rags.”
Matod ni Atty. Elvira Cruz, ang BOC Port of Cebu district
collector, nga nagkantidad og P1.5 milyones ang matag container vans nga anaa niining mga ukay-ukay gikan sa nasod sa Pakistan ug Thailand.
Lakip sa mga consignee niini mao ang F-A Trading, Cross Pointe, Rowena Grance Illusurio, Sandramiles Trading, ug Naba International Co. Ltd.
Niabot kini sa Port of Cebu Pebrero 2014; Hunyo 2017; ug Oktubre 2017.
Kon kaniadto sunogon sa BOC ang mga nasakmit niini nga mga ukay-ukay, karon subay na usab sa Presidential Directive No. 2018-0322, i-donate kini sa DSWD aron maapud-apod sa mga biktima sa Bagyong Ompong sa Cordillera Administrative Region (CAR).
maong direktiba aduna’y petsa niadtong Septiyembre 21, 2018.
“These are not relief goods, these are apprehended containers in violation of the Republic Act 4563,” si Cruz nagkanayon.
Si DSWD 7 Assistant Regional Director for Administration Grace Subong mao ang usa sa nisuta niining mga ukay-ukay kagahapon.
Matod ni Subong nga nisunod ra sila sa direktiba sa Presidente ug ilaha kining ipadala ngadto sa CAR.
Posible usab nga mao na kini ang pamaagi sa mga nasakmit nga ukay-ukay sa nasod diin kaniadto sunogon kini sa taga BOC. /