Mga dakbayan sa Sugbo, Mandaue mi-rehab sa Butuanon River
Sapa sa Butuanon, dulan na sa 10 porsyento nga na-rehabilitate.
Kini ang gipahibawo ni Mandaue City Mayor Luigi Quisumbing sa dihang gipangutana sa mga sakop sa media human sa presentation atol sa panagtigom kagahapon, Oktubre 26, sa buntag alang sa umaabot nga International River Summit nga ipahigayon sa Sugbo, diin ang Mandaue maoy mo-host.
Ang tigum giorganisa sa Mandaue City Chamber of Commerce and Industry (MCCI), uban na ang Mandaue City Government pinanguluhan nila ni Quisumbing ug Bise Mayor Carlo Fortuna, kadagkuan sa Department of Environment and Natural Resources, League Cities of the Philippines, ang Provincial Environment and Natural Resources Office ug uban pa.
Gipasabot ni Quisumbing nga ang dul-an 10 porsyento, tungod kini kay parte pa lang sa usa ka kilometro nga himuong pilot area sa Butuanon River ang nasugdan alang sa mga major component sa rehabilitasyon niini.
Gihimong pilot area ang kabahin sa sapa nga duol na sa parte nga magtagbo ang sapa ug dagat kun outfall niini. Kabahin sa 1 kilometer, ang sapa nga anaa sa barangay Ibabao-Estancia, Alang-alang ug Paknaan.
Sa pagkakaron gawas sa mga weekly clean-up drive sa nagkadaiyang departamento sa Mandaue City hall, uban na ang mga molupyo sa maong dapit ug mga nanarbaho sa mga establisemento nga nakapalibot niini, focus usab sa kagamhanan ang slope protection, pinaagi sa sheet piling, diin ang pikas nga bahin niini ang hapit na mahuman, diin gigastuhan kini sa gobyerno og P70 milyones.
Sa habig sa dakbayan sa Sugbo, gihulagway ni Konsehal Jerry Guardo, chairman sa committee on infrastructure sa konseho nga wala siyay nakitang kalangay sa pagtrabaho sa kontractor sa pag-rehab sa Butuanon River.
Matod ni Guardo, padayon ang pagtrabaho sa riprap sa isig ka kilid sa Butuanon sa Barangay Bacayan ug Talamban sa mga lugar nga mabaw ug dali molamwas ang baha panahon sa kusog nga uwan.
Iyang gipadayag nga nakig-alayon sab siya sa Cebu City 1st Engineering Office sanglit ang siyudad maoy gitahasan pag-monitor sa implementasyon sa proyekto nga nahimutang sa ilang area of responsibility.