NPC, Bakud mag-alyansa
Magpinirmahay og kasabotan alang sa panag-alyansa ang mga opisyal sa Nationalist People’s Coalition (NPC) ug Barug Alang sa Kauswagan ug Demokrasya (Bakud) Party karong adlawa isip pagpangandam sa umaabot nga piniliay sa Mayo 2019.
Alas 11:00 karong buntag, mahitabo ang pinirmahay sa panimalay sa mga Durano sa dakbayan sa Danao.
Si Senador Grace Poe, usa sa mga magpapili pagka senador ubos sa NPC, ang mopirma sa ngan sa nasudnong partido uban nila ni Joseph Felix Mari “Ace” Durano, ang bag-ong presidente sa Bakud, ug ubang mga haligi sa partido sama nila ni Danao City Mayor Ramon “Nito” Durano III, chairman emeritus, Kongresista Ramon “Red” Durano VI, kanhi presidente ug Bise Gobernador Agnes Magpale.
Motambong sa kalihokan si Gob. Hilario Davide III, sakop sa Liberal Party, nga nakigpares kang Magpale sa 2019
elections ug modagan pagka bise gobernador.
Human sa paglagda sa kasabotan, ipailaila sa Bakud party ang mga kandidato niini sa pagka kongresista, mayor, bise mayor ug mga konsehal sa Danao ug kalungsuran sa ikalimang distrito.
Ang proclamation rally mahitabo sa Danao City Civic Center sa ala 1:30 sa hapon.
Sila si Magpale, modagan pagka gobernador; Red, pagka kongresista; Bokal Miguel Antonio Magpale, nagpasubli sa pwesto; ug manghod ni Bokal Jude Thaddeus Sybico nga si Rosemarie Durano-Sybico, sa pagka provincial board member; ang magpapili ubos sa landong sa NPC dihang nisang-at sa ilang certificate of candidacy sa Commission on Elections sa miaging semana.
Ang ikalimang distrito gilangkoban sa siyudad sa Danao ug mga lungsod sa Borbon, Carmen, Catmon, Compostela, Liloan, Pilar, Poro, San Francisco, Sogod, ug Tudela.
Mahibaw-an sa rally kon kinsa ang mga kandidato sa pagka senador nga posible paluyohan sa Bakud.
Ang Bakud, kinadak-ang partido sa ikalimang distrito, nipaluyo sa kandidatura ni Poe sa pagka presidente sa miaging 2016.