US, New Zealand, South Korea, Singapore sa Sinulog

Mopatuman og daghang kausaban ang Sinulog Foundation Incorporated (SFI) alang sa Sinulog Festival sa Enero 20, sunod tuig.

Si Konsehal Dave Tumulak, chairman sa Executive Committee (ExeCom) nagkanayon nga gawas sa mga delegasyon gikan sa dakbayan ug out-oftown contingents, makita sab ang perfromance sa mga Filipino ug ilang mga higala gikan sa lainlaing nasod.

Lakip sa mga nasod nga moapil sa kompetisyon mao ang United States, New Zealand, South Korea ug Singapore diin sama sa local nga contingents, aduna gihapoy mga hurado ug hatagan sila og premyo.

Apan giklaro ni Tumulak nga di mopada og mananayaw ang maong mga nasod kon di video sa ilang interpretasyon sa Sinulog 2019 nga ipasalida atol sa Sinulog gikan alas 12:00 sa udto hangtod ala 1:00 sa hapon.

Giusab sab sa SFI ang tema sa Sinulog gikan sa One Beat, One Dance for the World gikan sa One Beat, One Dance, One Vision nga maoy gigamit sa taastaas na nga katuigan.

Si Tumulak nipasabot nga si Mayor Tomas Osmeña kinsa maoy over-all chairman sa Sinulog ug labaw sa SFI sanglit nag-anam na og kalapad ang giabtan sa Sinulog Festival.

“Gituyo ni nato aron pagboost sa atong tourism ug pagpahugot sa pagtuo ngadto ni Snr. Sto. Niño dili lamang dinhi sa Sugbo ug sa Pilipinas ang imahen ni Snr. Sto. Niño kon dili sa tibuok kalibutan,” paghulagway ni Tumulak.

Gipahibawo usab niya nga adunay 18 ka barangay sa Cebu City ang segurado nga moapil sa Sinulog sa dakbayan diin ang SFI nibahin sa duha ka kategoriya (sauna gitingob), diin lima ang mamahimong mananaog sa Sinulog Base ug laing 5 sa Free Interpretation nga otamatik malakip sa Sinulog Festival uban ang wala makadaog.