BUS 10 MINUTOS RA MAGPUNDO

Limitado hangtod sa 10 minutos ang labing taas nga oras nga magpundo ang mga bus sud sa Cebu South Bus Terminal (CSBT) sugod sunod semana aron makabiyahe ug makabalik kini sa gipaabot nga pagdagsa sa mga pasahero alang sa mga adlaw sa mga minatay ug mga santos. Si Jonathan Tumulak, terminal manager sa Cebu South Bus Terminal (CSBT), nipasabot nga ning panahon sa tingsakay, taas na ang 10 minutos sa pag-estar sa mga bus sud sa terminal.

“Dali ra gyud kaayo, as long as mapuno dayon ang bus, pullout. Kon kanang sakay na gyud kaayo, kanang 5 minutes

to 10 minutes, igo-igo nana makalingkod ang mga pasahero, pullout dayon siya basta tingsakay, tagsa ra kaayo magdugay,” pamulong niini dihang nahinabi sa mga tigbalita sa Kapitolyo kagahapon.

Kon ordinaryo nga mga adlaw, way okasyon o di tingsakay, tugotan ang mga bus nga maka-park sud sa CSBT hangtod sa 20 minutos.

Si Tumulak nipahibawo nga dunay 110 ka mga empleyado sa Kapitolyo ang motabang og atiman sa mga pasahero samtang magpaabot sa linya o sa pag-abot sa mga bus, aron hapsay ang operasyon sud sa terminal nga abli sud sa 24 oras.

Gidoble usab sa CSBT karong tuiga ang gidaghanon sa mga pulis nga nadestino sa terminal kon itandi sa miaging tuig, ug miabag usab ang mga military ug sakop sa Philippine Drug Enforcement Agency (PDEA).

Ang mga pulis gikan sa Cebu Provincial Police Office ang mohatag og seguridad sud sa terminal sud sa 24 oras samtang mga pulis gikan sa Cebu City Police Office ang mobantay sa seguridad sa gawas.