Every moment you touch me
Nahunahuna ug nakumbensir gyud ko sa tambag ni Syreel nako. Pagkasunod enrollment, mibalik kog eskuwela. Nalipay sila si Mama ug Papa. Duha na ang akong responsibilidad, si Baby Boy ug ang akong future. Wa na gyud ko magpatental ug magpadala sa mga lalaki. Guwapa ko, ug bisan duna na koy anak apan nindot gihapon kog lawas. Tungod ani daghan ang nangulitawo nako sa eskol.
Apan gibalibaran ko silang tanan, kay gawas nga wa mopitik ang akong kasingkasing sa paghigugma bisan kinsa kanila, nahadlok na sab ko nga madisgraya pag-usab ang akong pagka babaye. Ang akong pagtungha ug ang akong anak na lamang ang gihatagan kog dakong panahon.
Usa ka adlaw nga nag-esnak ko sa school canteen, wa dayon ko makalihok ug makatingog dihang usa ka lalaki ang miduol nako ug nakig-share sa akong table. Nakusmod kong mitan-aw niya. Mitindog ko ug gustong mobiya dayon niya apan iyang gikuptan ang akong bukton. Dali kong giwakli ang iyang kamot.
“Kabaga gyud nimog nawong, uy, Dante! Nakahimo pa uroy ka sa pagpakita nako, no? Kawa’a gyud nimoy uwaw, uy! Wa kay baroganang pagka tawo!”
Kahilakon ko nga mituisok kang Dante.
“Pasayloa ko, Lorena. Nia ko ron dinhi aron sa pagpakig-estorya gyud nimo. Barogan ko na ang akong kaakohan nimo. Pakaslan tika.”
Wa ko makatingog. Nakalitan ko sa gisulti ni Dante. Inanay kong mibalik paglingkod sa iyang atbang.
“Nahimo kong talawan kay nahadlok ko nga di makabuhi nimo ug sa atong anak. Mga batan-on pa man ta ug nag-eskuwela. Pero gisabot ko sa akong parents. Naluoy sila nimo ug sa atong anak. Gusto nila nga magpakasal ta. Sila ang mogasto nato sa pagpadayon natog eskuwela, Lor.”
“Pakaslan ko nimo tungod sa imong kaluoy nako ug sa atong anak, mao ba, Dante?”
Nagpabiling isog ang akong tingog. Wa dayon ko magpadala sa iyang giingon.
“Oo. Tinuod na, Lor, pero ang labing dakong rason nga pakaslan tika kay love ta gyud ka.”
Nahilom ko. Nakatan-aw kog dugay kang Dante. Kanindot sa iyang gipasalig kanako. Apan sa gihapon, wa ko siya hatagi og paglaom sa gusto niyang mahitabo. Morag nahadlok na gyud ko nga mabiktima sa iyang pagka bakakon.