Tepora moaway sa undercard Pacquiao-Boner fight sa Enero 2019

Sa makausa pa, moaway na usab ang Sugboanong World Boxing Association (WBA) interim world featherweight champion Jhack Tepora sa undercard sa Manny Pacquiao-Adrien Broner fight nga gikatakda sa Enero 19, 2019 didto sa Las Vegas, Nevada.

Wala pa man tuod matino ug mahingpit kon kinsa ang makontra sa undefeated fighter, apan matod pa sa tinubdan, nga ang maong away maoy magsilbing unang pagdepensa ni Tepora sa titulo nga iyang nalangkat niadtong Hulyo 15, ning tuiga didto sa Kuala Lumpur, Malaysia.

Sa maong away nga nagsilbi usab nga undercard sa Pacquiao-Lucas Matthysee fight, gi-knockout ni Tepora ang Mexicanong si Edivaldo Ortega sa ikasiyam nga round aron paglabni sa bakanting korona.

“Sa pagkakaron, nag-jogging jogging lang sa ko, pero sugod ko sa full training sa December na, kami sa akong maguwang nga si Jingjing,” matod ni Tepora kinsa mibutyag nga dili na siya interesado nga makig-uban sa kontrobersiyal niyang headcoach nga si Julius Erving Junco.

Matod ni Tepora nga posibling adto na sa Las Vegas ipahigayon ang iyang subsob nga training hangtod na sa iyang away.

Sa pagkakaron, si Jingjing atoa pa sa Japan sanglit gikuha kini isip usa sa mga trainer ni kanhi world champion Tomoki Kameda kinsa nagpreparar alang sa iyang world title fight.

Mouli na kini sa Nobiyembre 14 ug ning higayona mosugod na sila sa ilang training.

Apan surprisang gibutyag ni Tepora nga wala na siya mag-adtoan sa Omega Boxing gym ug iya karong laraw nga adto na lang sila mag-ensayo sa balay sa iyang maguwang sa Lilo-an, pipila ka kilometro ang gilay-on gikan sa siyudad sa Sugbo.

Giangkon ni Tepora nga sa gihapon ubos siya sa kontrata sa Omega Boxing Gym.