UV MOLABNI SA KAMPIYONATO

Jaguars dili motugot, nagpanikad nga mobawos

Duwa karon 6:00 pm- UV batok USJ-R (Game 2, college finals) Kompletuhon og suway sa

defending champions UV Green Lancers ang ilang gitinguhang lain na sab nga Grandslam title sa ilang pagpakigbatok og balik sa USJ-R Jaguars sa Game 2 sa finals series sa CESAFI basketball college division sa Cebu Coliseum.

Ang Green Lancers ang-ungong na sa pultahan sa kalampusan human sa kulbahinam nilang kadaugan sa Game 1 sa best-of-three series, 78-74.

Nagkanayon si Green Lancers coach Gary Cortes nga nasayod siyang dili bastabasta ihatag sa Jaguars ang ilang gipangandoy apan andam determinado silang humanon na ang series karong adlawa.

“Sa ako nang gisulti ani nga series, ang mamilok pilde. Kinahanglang focus gyud mi. Mao gihapon ni ugma kay for sure dili na mo-give up ang USJ-R easily,” matod ni Cortes sa pagpakighinabi ning mantalaan kagahapon.

Adunay solidong punto si Cortes gumikan kay ang Jaguars positibo gihapon nga maangkon ang labing una nilang titulo taliwala sa ilang kapildihan sa Game 1.

“Positive gihapon mi. Ang among moral taas gihapon. Kinahanglan lang gyud nga mo-adjust mi’g gamay,” matod ni Jaguars rookie coach Leodie Garcia.

Gipasabot ni Garcia nga tungod sa kakuwang og kasinatian sa championship, nanggigil ang iyang mga batos nga miresulta sa daghan nilang turnovers sa Game 1.

Mao kini ang labing unang higayon nga nakataak og balik sa finals ang Jaguars sulod sa usa ka dekada.

“Kinahanglang ma-limit namo ang among turnovers. Sa Game 1, mura’g wa mi nagduwa’g championship. Dili to klase sa level sa duwa nga pang-championship,” dugang ni Garcia.

“Sa championship experience, mas anad man gyud sila pero positive mi nga maka-recover.

Hopefully naa’y deciding game.” Gitataw ni Garcia nga maayo nilang pagkasikop sa surpresa dihang kalit lang niulbo ang duwa sa usa sa reserba sa Lancers nga si Jafet Claridad.

Si Claridad nitampo og 14 puntos sa kadaugan sa Green Lancers lakip na niini ang krusyal nga three-point shot nga nakahatag sa back-to-back champions og 77-74 nga labaw sa 1:29 minutos sa duwa.

“Na-caught by surprise gyud mi ni Claridad. Sa first two

games namo sa elimination, wala gyud na siya maong wa mi nag-expect ato,” asoy ni Garcia.

Sama sa naandan, ang Green Lancers magsalig og maayo sa ilang lider nga si kanhi MVP Rey Suerte, kinsa ni-graduwar kagahapon sa kursong Human Resourece Development Management.

Gawas nila ni Suerte ug Claridad, ang Green Lancers mosandig sab sa abilidad nila ni Jancork Cabahug, Josue Segumpan, Michael Maester ug import Bassiey Sackor.

Moparang sa mga nangahisgutan mao ang mga pambato sa Jaguars nga sila si John Ubalde, RJ Dinolan, Miguel Gastador, Fletcher Galvez, import Tochukwi Ewenike ug sa kasamtangang MVP Jaybie Mantilla.

/ ALAN TANGCAWAN ■ FLYING HIGH: Si RJ Dinolan, nagkupot sa bola, sa USJ-R Jaguars nga mi-lay up atubangan sa naglupad usab nga si Rey Suerte sa University of the Visayas (UV) Green Lancers nga misuway sa pagtapal kaniya niining aktoha samtang nagtan-aw si Nichole John Ubalde (13) sa USJ-R niining aktoha atol sa Game One niadtong Huwebes sa Cesafi best-ofthree finals men’s basketball sa Cebu Coliseum.