Kong. Red wa mabalaka sa pag-atbang ni Duke kaniya
Wa ikaguol ni Kongresista Ramon “Red” Durano VI nga ang iyang kaatbang sa pagka kongresista sa umaabot piniliay nga si kanhi Liloan mayor ug kanhi Cebu Port Authority Commissioner Vincent Franco “Duke” Frasco ang giindurso ni presidential daughter ug Davao City Mayor Sara Duterte-Carpio.
Matod ni Red, wa sila magagad og endorsement gikan sa taas aron sila modaug.
“In fact, kita maoy panuolon sa mga pulitiko kay in the past we’ve shown that we are united here in the fifth district and kinsay suportaan nato nga mga kandidato, mao gyuy dumadaug. A lot of politicians can attest to that,” paambit sa incumbent nga kongresista ug provincial chairman sa Nationalist People’s Coalition (NPC).
Gisulti kini ni Red human gipirmahan ang paglab-as sa panag-alyansa tali sa NPC ug Barug alang sa Kauswagan ug Demokrasya (Bakud) party niadtong Sabado, Oktubre 27, sa panimalay sa mga Durano sa dakbayan sa Danao.
Si Senador Grace Poe, sinagop nga kandidato sa NPC, apil sa nipirma uban sila si Danao City Mayor Ramon “Nito” Durano III, chairman emeritus sa Bakud; Joseph Felix Mari “Ace” Durano, bag-ong presidente sa partido; Red; ug Jose Thaddeus Roble Jr., secretary general sa Bakud.
Nitestigo sila si Bise Gobernador Agnes Magpale ug Gobernador Hilario Davide III, ang paresan nga paluyohan sa Bakud ug NPC.
Matod ni Ace, sa maong panag-alyansa, sila nisaad nga suportaan ang matag usa sa ilang mga kandidato sa national ug lokal sa Mayo 13, 2019 nga mid-term elections.
Kini ang mga reelectionist nga sila si Senators Poe, Cynthia Villar, JV Ejercito ug Sonny Angara; actor nga si Lito Lapid ug Ilocos Governor Imee Marcos.
Matod ni Poe, agi og suporta sa Bakud nga nipaluyo niya sa miaging 2016 presidential elections, suportaan usab niya ang paresan nila ni Magpale, bise presidente sa Bakud; ug Davide, nagpabilin sa Liberal Party.