PS 10 anaa sa Brgy. Labangon

Karong adlawa nahulog nga unang adlaw sa Police Station 10 sa Cebu City Police Office (CCPO) sa bag-ong opisina niini sa 2nd floor sa Senior Citizens Building sa Barangay Labangon, dakbayan sa Sugbo.

Ang estasyon nga mas naila nga Punta Princesa Police Station, di hingpit nga mawagtang sa barangay tungod kay gibutyag sa hepe niini nga si P/CInsp. Clark Arriola nga magpabilin ang custodial facility niini sa maong estasyon.

“Di nimo siya matawag per se transfer gyud kay I’d still be maintaining my per se detachment na sa Punta Princesa,” matod ni Arriola nga nahinabi sa Superbalita Cebu.

Gibutyag usab niini nga ang maong plano nga mabalhin kaniadto pa kini kang P/CInsp. Ramoncillo Sawan, dihang siya pa ang hepe.

“Wala ma’y issue,” dihang mitumaw ang isyu nga wa sila tugoti sa barangay nga mo-expand sa ilang estasyon.

Dugang niini nga wala na usay lugar kon gusto nilang palapdan pa ang ilang police station.

“Very wise (ang Barangay Labangon) kay naa pud didto ang fire, naa pud didto ang disaster, dali na ang coordination nato within the different offices sa government nga kinsay mo-handle sa lain-lain nga scenarios nga mahitabo.”

Karong adlawa, ibutang na ni Arriola ang mga imbestigador sa bag-ong buhatan niini sa Labangon ug kon didto sa Punta gihapon mo adto ang publiko, ilaha kining dalhon sa Labangon.