Tokhang nahimong ‘word of the year’
Nahimong duguon ang gubat kontra druga, usa sa mga programa sa administrasyon ni Presidente Rodrigo Duterte. Daghang mga kinabuhi ang nakalas. Apan managlahi ang ihap sa mga napatay, depende kon si kinsa ang tinubdan, gikan sa mokabat sa 4,000 hangtod sa 20,000.
Ang kapulisan niingon nga mokabat sa kapin sa 4,000 ka mga drug personalities ang napatay kay nisukol atol sa mga lihitimo nga operasyon batok sa illegal nga drugas. Apan adunay kapin sa 16,000 ka mga kaso sa homicide nga gibutang isip “death under investigation” (DUI).
Kon daghang napatay, daghan usab ang mga pulong nga mitumaw tungod sa gubat kontra druga. Lakip na niini ang DUI, ang extra-judicial killing (EJK) ug ang “tokhang” nga naporma pinaagi sa pagsumpay sa mga sinugdan sa mga pulong Bisaya nga toktok ug hangyo.
Apan sa maong mga termino, ang “tokhang” maoy napili nga Salita ng Taon (Word of the Year) karong tuiga sa Komisyon ng Wikang Filipino (KWF) ug sa University of the Philippines (UP) Diliman.
Nag-una ang tokhang sa onse ka mga pulong nga ginombrar niadtong Biyernes sa komperensiya nga giulohan og “Sawikaan 2018: Pambansang Kumperensiya sa Salita ng Taon,” usa ka proyekto sa Filipinas Institute of Translation ug suportado sa Office of the Chancellor sa UP Diliman, UP Diliman Information Office ug KWF.
Nahimong popular ang tokhang sa dihang ang mga sakop sa Philippine National Police mosuroy sa kabalayan ug nanuktok sa mga pultahan aron paghangyo sa mga tiggamitan og illegal nga drugas mga mo-surrender ug magparehabilitate. Kadtong di mopatuo unya mapatay sa police operation ingnon nga natokhang.
Ang second placer sa word of the year mao ang “fake news” ug ang third placer mao ang “Den vaxia,” ang kontrobersiyal nga bakuna batok sa dengue nga nagbutang na hinuon sa peligro sa mga kabataan nga nabakunahan.
Ang tokhang naumol gikan sa pinulongang Bisaya apan napopular tibuok sa nasud.