Biyahe para sa kalagkalag
Gipaabot ang pagbaha sa mga pasahero sa mga pantalan, tugpahanan og bus terminal samtang nagkaduol na ang pagsaulog sa Kalagkalag 2018.
Ang mga tinugyanan ning maong mga pasilidad nakaumol na sa ilang mga programa unsaon pagpahapsay ang bul-og sa mga pasahero. Sama sa naandan napanglantawan ang daghang problema nga motumaw. Nag-una niini mao ang kakuwang sa mga biyahe ilabi na diha sa mga bus terminal.
Sa tinud-anay lang karaan na kaayo kining maong problema og ang tukma nga solusyon wa pa hipalgi hangtod karon. Bisan moingon pa ang mga operator nga magpuno og mga bus, taas nga linya sa mfa sumasakay ang kanunay nga masaksihan.
Bisan unsa nalang nga matang sa diskarte ang gipatuman apan wa gihapoy alibyo. Sa South og North bus terminal dinhi sa ato makalipong ang taas nga linya. Ang rason kay dugay makabalik ang mga bus sa duha ka terminal. Ang katarungan sa mga driver kini tungod sa trapik nga ilang gisum-ok mao nga langay ang ilang pagbalik.
Bisan unsa pay buhaton sa mga manager sa terminal kong di matutukan ang kahuot sa kadalanan nga gisubay ning maong mga bus, pakyas ang ilang paningkamot. Ambot kong duna bay paningkamot nga kini mapatunhay inabagan sa mga local government units.
Pananglit diha sa South Road Properties og South Coastal Road. Diha pa lang daan hilabihan kalangay sa biyahe usa oa ka moabot sa eskina Linao, Talisay City.
Unyag abot nimo sa maong dapit lain na sab nga kalangay ang nasugatan hangtod nga moabot ka sa utlanan sa Minglanilla og ciudad sa Naga. Sa ato pa ang akong gipanghisgutan sa unahan maoy tunok sa kalangay sa biyahe padung sa Cebu City og sa South. Wa pa ni labot sa mga pat-ak pat-ak nga ptoblema sa trapiko sa mga highway diin nagpadayon ang mga concreting project. Basi ning maong mga sitwasyon unta nangandam na sab ang mga LGU pag-abag nga maminos minosan ang mga kahasol nga masugatan sa mga dRiver sa bus.
Kay kong wa silay giumol nga programa labot niini sama sa naandan kaguliyang og kahasol ang magpasuwabe sa atong mga terminal.
Kana lang reklamo batok sa traffic light sa mga intersection sa south coastal road nga wa pa matagad daan na nang hasol. Ang gitumbok mao ang interval sa Go og Red signal. Unta mas taas og minutos ang nagsubay padung sa habagatan kay sa mga sakyanan nga mopadung sa interior nga bahin.
Pun-an pa sa mga trisikad nga nagpasad sa mga eskina nisamot ka masulob-on ang sitwasyon.
○○○
Sa mga pantalan sama diha sa dakbayan sa Sugbo may mga paagi nga gipatuman nga naghatag og special permit alang sa extra nga biyahe sa mga ruta nga gidagsaan og mga pasahero.
Ang ako lang gikahadlokan mao kadtong mga pasahero nga di ka antos sa pagpinaabot og kasakyan unya mohukom nga namakyaw og pumpboat padung sa ilang destinasyon.
Sayod na ang Coastguard ning maong problema. Pero ang akong g8kabalak-an mao kadtong mga baybayon nga way Coastguard.
Kinsa may mamadlong didto. Busa sa mga gustong mobiyahe kong maapiki na gani ang inyong kaluwasan ayaw gyud og ipamugos.
Apil na gani nang manghitch nga mopugos gyud og sakay bisan kong namuwak na sa mga pasahero ang ilang sakyan. Komon ni diha sa probinsiya.
Sama anang mga trak de karga nga sa kadaghan sa mga pasahero di na mahitsura. Siguro gipaundayonan lang sab kay mao naman ang naandan bisan kong di panahon sa kalag kalag.
What we say is what we do and ang among commitment maoy among tumanon. Dili mi pareho aning ubang mga political parties, mga pulitiko nga mokalit lang og bali at the middle of the game.”
- Cebu 5th District Representative Red Durano