Gustong magkauyab

Dear Papa Joe,

Ako si Roxan, 22 years old, nagpuyo sa Cebu tipon sa akong iyaan nga lahi og relihiyon. Taga probinsiya gyud ko pero dihang nakahuman kog eskwela, gipaari ko ni Tiya diri sa Cebu para motabang tabang sa ilang negosyo.

Okay ra man kay pinangga man ko nila sama sa ilang mga anak. Pero usahay makahuna-huna kong wala na koy life. Wala sab koy suroy-suroy sa gawas. Kada day-off man gud sa adlaw nga Dominggo, halos tua man mi sa ilang church. Inig kahuman sa trabaho, matulog na dayon unya inig ka ugma, motrabaho unya sa Sunday mag-church.

Okay ra man unta pero nakahuna-huna kog makakita kaha kog forever aning kalakiha? Ganahan pod baya unta ko makauyab pero sila si Tiya gusto man nga pareho namog relihiyon ang lalake unya wala man gyud koy nauynan sa mga ulitawo sa among church. Usahay ma depress ko, maguol ko ug mag post kog mga lonely-lonely sa FB.

Unsay akong buhaton para magka-naa pod koy freedom sa akong self, Papa Joe? Bata pa raba unta ko. Dapat unta mag-enjoy pa ko sa world. Palihug tambagi ko.

ROXAN

Dear Roxan,

Lahi-lahi gyud og dagan ang kinabuhi sa tawo. Dunay uban nga sama nimo, gikan og probinsiya, naghandom nga unta dunay pamilya or somebody nga moatiman nil. Ang uban nag wish nga makatrabaho o dunay masak-an nga panimay para maka-save sa abangan.

Daghan ang mga sama nimo karon nga nag-ampo nga sila ang naa sa imong nahimutangan. Kaswerte na nimo, duna kay trabaho, duna kay libreng gipuy-an ug pamilya nga nagmahal nimo isip ilang anak.

Tinuod isip usa ka batan-on magpangita gyud kag kaugalingon nimong kalipay sama sa barkada, laag ug uyab. Kon gusto kang molaag, mag-malling or manan-aw og sine, pwede man siguro kang mananghid og tarong nila. Ug parte sa lalake nga gusto na kang magkauyab, iampo nga moabot ang saktong lalake para nimo. Ayaw pagdali-dali kay matod pa moabot na sa tamang panahon.

PAPA JOE

(Sa inyong mga problema ipadala sa papajoesuperba@gmail.com)