Every moment you touch me
Klaro sa mga mata ni Syreel nga duna siyay frustration nga gibati. Unya nakatan-aw na sab ko sa iyang kamot nga mikupot sa usa ko ka kamot.
“Sukad karon, di na tika hasulon, Lor. Di na ko magpaduol nimo.”
“Wa man ka maghasol nako, Syreel. Tungod ba kang Dante maong nakaingon ka ana?”
Igo ko lang gipasiplatan si Syreel ug pagkahuman, didto na ko motan-aw sa usa ka tawo nga namukot di layo sa among gilingkorang seawall. Diha sab gani namasol.
“Yes. To give you enough time sa paghunahuna kon unsa gyuy tinuod nga imong gibati kang Dante sa pagka karon. Kon love mo gihapon siya, ayaw pugngi ang imong kaugalingon. Duna na man sab moy anak. Magpakasal na man siya nimo.”
“I don’t know, Syreel. Yes, I really don’t know kon unsay akong desisyon nga ipakanaog aning sitwasyona. Maybe husto ka. Maybe sayop sab.”
Naghilom na si Syreel. Naghilom na lang sab ko.
Nanglabay ang mga adlaw. Nagkadako na si Baby Boy. Makamao na siyang magkamang-kamang. Wa na gyud mopaduol si Syreel nako, samtang si Dante kanunay naghangyo nako nga mosugot na unta kong magpakasal niya.
Dunay mga higayon labi nag nag-inusara ko nga si Syreel ang masulod sa akong hunahuna. Morag gipangita ko ang iyang kanunay nga pag-touch nako, ang kanunay niyang pagkupot sa akong kamot. Morag gimingaw na ko ani.
Apan naglikay na si Syreel nako. Ug usahay, ambot ba nga mokalit man lag tulo ang akong mga luha. Gimingaw gyud ko kang Syreel.
Ug usa ka desisyon ang akong gipakanaog.
“Gikasubo ko, Dante. Di ko magpakasal nimo.” Miginhawa ko pag-ayo. “Wa na koy nabatyagang pagmahal nimo.”
Nakapanghupaw si Dante nga mitindog.
“Dawaton ko ang imong desisyon, Lorena.”
Unya, mibiya na si Dante nako. Igo ko lang siyang gisundan sa pagtan-aw nga migawas sa pultahan sa sala. Namisita gyud siya nako niadtong gabhiona. Morag naibtan kog mga tunok sa dughan. Nabatyagan ko ang kaluag sa akong pagbati.
“Giprangkahan ko na si Dante, Syreel, nga wa koy love niya.”
Usa ka higayon, giduol ko si Syreel nga naglingkod sa seawall sa reclamation sa among lugar. Nindot kaayo siyag smile nga mikupot sa akong kamot.
(KATAPUSAN)