Nabuhi ang kagahapon
Sukad siya madestino sa ilang ahensiya sa Tagbilaran City karon pa siya batiag kakulba. Nagpamatid ang iyang kasingkasing nga nakiglumba sa mga gutling sa pagpaabot. Nia siya sa gamayng tindahan duol sa tiilan sa hagdanan sa Chocolate Hills nag-inom og coke nga ang botelya nagdahinggay sa kabugnaw. Wa moabot ang iyang kasabot nga si Nelia, ang iyang penpal nga 20 na ka mga tuig ang nakalabay. Gustong makigkita niya human kini makadungog sa interview kaniya ni Fred Areta sa estasyon DYRD.
“Ikaw si Nelia Kalabasa nga akong kanhing penpal?”
“O, ako. Dugay na to, uy! Tin-edyer pa ta,” tubag sa pikas linya.
Sa kahinam nakigsabot siya sa babaye nga makigkita niini, apan gusto kini nga adto sila magtagbo sa nabantog na kaayong chocolate hills. Mao tong nananghid siya sa ilang manedyer nga daling misugot sa iyang pasangil nga makigtagbo sa mga mag-uuma sa Carmen ug San Miguel. “Nabalik lagi dayon ka, Sir?” matod sa ilang bodigero nga si Romy nga nag-andam sa gamayng lamesa sa ilang paniudto. Mikidhat ang iyang drayber nga si Vic.
“Akoy nagluto, Sir, sa imong paborito.”
Wa motubag si Rene. Hinunoa gipahiyumag gisenyasan niya sa iyang kumagko ang iyang drayber nga batid molutog sari-saring utan ug hinalangang manok nga iya rong nakita nga nag-alisngaw sa kainit.
Pagka gabii gida sila ni Romy sa suki niining videokihan. May matahom babaye nga misud. Midritso paggunit sa mike ug miawit. Mora kog natuk-an nga naminaw sa katamis sa iyang tingog.
“Siya si Noemi, Sir, ang tag-iya ning videokihan,” ni Romy nga nagtutok sa babaye.
Paghumag kanta sa tag-iya miduol kini sa ilang lamesa. “Siya ang akong Boss, Noe, si Erdie Riosa,” paila ni Romy. “Sa atbang iyang pilot nga si Vic.”
Mipahiyom ang babaye kaniya. Mitutok. Morag gianinaw ang iyang panagway Dayon, mipahiyom pagbalik kaniya.
Human niadto, subsob ang iyang pakigkita kang Noemi kay nabihag niini ang iyang kasingkasing. Wa madugay nagkatakdo ang ilang pag- bati. Usa ka gabii human sa ilang pagpanuroy, sa mabugnawng lawak sa chocolate hills nakutlo niya ang laing katam-is sa pagka babaye ni Noemi. Mitug-an kini nga siya biyudang way anak sa usa ka negusiyante sa Sugbo.
Nagdali siyang nag-ilis kay moadto sa Tagbilaran. Si Manager Alden Borca moadto na sa Germany sa Sabado isip eskolar. Dugay na ning nagpaabot sa go-signal sa Central Office, Manila. Mipuli si Erdie sa puwesto kay siya man ang luyo-luyong manedyer. Mikring ang telepono sa opisina may gikanaog ang sekretarya nga si Jenifer. Iyang gipunit. Gipaila niya iyang kaugalingon. “Erdie, Speaking.”
“Si Nella ni, makigkita ko nimo sa Bohol Tropics. Okey ka?”
Nagpaabot na sad siya karon sa Bohol Tropics. Kon mangindiyan na sad ni, iyang pangitaon ug kasab-an kay gamay ra gud ang Tagbilaran. May misud sa lounge area. Si Noemi nga iyang uyab sa Carmen. Mitalikod siyag dali. “Hoy, di ka kaipsot, duna kay date, no?” Daling nakahukom siya. “Duna koy gipaabot nga penpal, morag nangindiyan na sad.”
Mibanos ang dugayng kahilom. “Wa siya mangindiyan, Erdie, kay ako si Nelia nga nagtakuban og Noemi sa Carmen. Natuk-an siyag kadiyot. Iyang gigabling ang babaye paatubang kaniya. Gigakos hugot kaayo. “Ikaw, diay si Nelia?!” Wa kapugngi giukoban niya ang mga ngabil niini. Sa sulod ang hawot nga huni sa piyano mianod-anod sa panagtapot.sa ilang mga lawas.
(KATAPUSAN)