Petalcorin mosuway og langkat sa IBF light fly title

Gilauman ang grabeng binukbokay sa panagharong nila ni Filipino Randy Petalcorin ug Nicaraguan Felix Alvarado alang sa inilugay sa bakanteng International Boxing Federation (IBF) light flyweight crown karong adlawa sa Midas Hotel and Casino Tent sa Pasay City.

Ning panagharong sa parehong knockout punchers, ang antimanong makauna pagpasulod og solidong kumo mao ang adunay dakong poruhan nga modaog.

Si Petalcorin naggunit og 29-2-1, 22KOs nga rekord samtang si Alvarado naghupot og 33-2, 29KOs nga baraha.

Ang 26 anyos nga si Petalcorin midaog pinaagi sa knockouts sa katapusan niyang unom ka mga away diin ang labing ulahing biktima mao si Jade Yagahon niadtong Mayo.

Sa iyang bahin, si Alvarado mipakamang sa 14 niya ka mga kontra sa katapusan niyang 15 ka mga away.

Sa interbyu sa rappler.com, nagkanayon si Petalcorin, kinsa sakop sa Sanman gym sa General Santos City, nga grabe ang iyang pagpangandam alang ning awaya ug dili niya gustong usikan kining maong oportunidad.

Matod ni Petalcorin nga naa siya sa labing maayo niyang kondisyon sukad masukad.

Sama kang Petalcorin, si Alvarado puno sab sa pagsalig.

“I have waited for so long for this chance and will never let it go. My country is filled with conflicts and tragedies. This win will be my gift to the Nicaraguan people,” matod ni Alvarado.

Ang gitambayayungan pagpasiugda sa ESPN5 Boxing, MP Promotions, Sanman Promotions ug Peter Maniatis Events.