LAKERS GIUSBAN SA SPURS, 110-106

Giusban pagbuntog sa hosts San Antonio Spurs ang Los Angeles Lakers, 110-106, kagahapon sa National Basketball Association (NBA).

Sa pagpangulo sa bag-o nilang pambato nga si DeMar DeRozan, ang Spurs ning-rally sa 4th quarter aron wagtangan og bili ang kabangis nga gipakita sa bag-ong lider sa Lakers nga si LeBron James.

Gipangulohan ni DeRozan ang Spurs pinaagi sa iyang 30 puntos, 12 rebounds ug walo ka assists samtang gipangulohan ni James ang nangaminghoy nga Lakers pinaagi sa iyang 35 puntos ug 11 rebounds.

“Whenever we’re down, it’s kind of natural to me to just try to be more aggressive,” pasabot ni DeRozan.

Sa kadaugan sa Spurs, si Gregg Popovich nahimong ikalimang coach sa kasaysayan sa NBA nga nakaabot og 1,200 ka mga daog ug labing unang nakahimo niini ubos sa usa lang ka team.

Si DeRozan maoy nakahatag sa Spurs sa labing una niining labaw, 93-91, nga nahitabo sa nahabiling kapin sa 10 ka mga minutos sa duwa.

Nainat sa Spurs ang ilang labaw ngadto sa walo ka mga puntos apan sa hinayhinay, nakasikit pagbalik ang Lakers, 106-105.

Human niini, nagtinubagay sa pagmugna og puntos ang duha ka mga kampo apan sa hinapos nga bahin, nakahigayon ang Spurs sa pagposte sa upat ka mga puntos nga kadaugan.

“When you have those games where your offense isn’t clicking like it is, you’ve got to be able to rely on your defense, and we did that tonight,” pasabot ni James.

“We were down one, they had the ball, and DeRozan hit a tough, tough two over Josh. We did our job, and that’s all you can ask for.”

Sa laing duwa, mipahagsa si Jaylen Brown og 19 puntos, Marcus Morris midugang og 18 ug gipakgang sa Boston Celtics ang Detroit Pistons, 109-89.

Kadto maoy unang kapildihan nga naangkon sa Piston human sa lima nila ka mga duwa.

Si Andre Drummond mikolekta usab og 18 puntos ug walo ka rebounds.