UV, USJ-R MAGTIWAS
UV coach Cortes gisuspenso
Duwa karon
6:00 pm- USJ-R batok UV (Finals deciding Game 3)
Kon ang rookie coach sa USJ-R nga si Leodie Garcia ang pangutan-on, naangkon na nila ang labing una nilang titulo sa CESAFI basketball college division.
Dala ang hinagiban nga usa ka bersikulo sa bibliya, si Garcia ug ang kinatibuk-ang puwersa sa Jaguars puno sa pagsalig nga mailog nila ang titulo sa ilang pagpakigharong og balik sa defending champions UV Green Lancers sugod karong alas 6:00 sa gabii sa deciding Game 3 sa gikaintapang championship series sa Cebu Coliseum.
“Amo na ning gi-claim daan ang title. Positive gyud kaayo mi. Dili man ni panghambog atoa, pero wala ma’y mawala kon amo na ning i-claim daan as part sa among motivation,” matod ni Garcia sa pagpakighinabi ning mantalaan kagahapon. “Naa man sab ni sa bible
verse. Hopefully ihatag na ni sa Ginuo namo ugma.”
Gitumbok ni Garcia mao
ang bersikulo Mark 11:24 nga nag-ingon, “Therefore I tell you, whatever you ask in prayer, believe that you received it and it will be yours.”
Hinuon nasayod si Garcia nga daghan pa sila angayang trabahuon aron makuha ang gihandom nga kalampusan.
“Akong giingnan ang mga bata nga katapusan na ning sakripisyo for this season. Kinahanglang focus gyud mi,” dugang ni Garcia.
Ning kombatiha, ang Green Lancers mokombati nga wala ang ilang headcoach nga si Gary Cortes, kinsa napahamtangan og usa ka duwa nga suspensyon human kini natawagan og duha ka technical fouls sa 58-68 nilang kapildihan sa Game 2 nga maoy nakatabla sa series, 1-1, niadtong Sabado.
Gidawat man tuod ni Cortes ang silot ngadto kaniya apan wala kini nakapugong sa iyang emosyon ug nipabuhagay kini sa iyang gibati pinaagi sa iyang
social media kabahin sa Game 2.
“I know how to accept defeat, much more against a top caliber team USJ-R. But it is the worst officiating in my entire career. Worst !!!! ” post ni Cortes sa iyang Facebook account.
Gawas nga na-thrown out si Cortes sa Game 2 tungod sa duha ka technical fouls, aduna sab kini gikabikil nga usa ka tumatan-aw nga gituohang sumosunod sa Jaguars gumikan sa iyang kapungot. Nagkanayon si deputy commissioner Danny Duran nga ang maong tumatan-aw molabang unta sa korte aron atakihon si Cortes nga niadtong higayuna naglingkod sa likod sa lingkuranan sa Green Lancers human kini na-thrown out.
“Naghinagitay man gud to sila unya molabang man unta tong usa ka fan sa San Jose, akong gipugngan. Nireklamo lagi tong tawhana nganong naa gihapon si Gary nga na
thrown na man unta. Akong giingnan nga amoa ning problema sa technical committee,” pasabot ni Duran.
“Wala pa man sab to ma-resume ang duwa pero amoa man gyud tong ipalayo si Gary nga dili siya maka-communicate sa UV team.”
Sa pagpakighinabi ning mantalaan kagahapon, ang kalmado na’ng si Cortes igo na lang sa pag-ingon nga, “huwat lang mi’g unsa’y game plan nila ugma.”