PRO 7 andam moduma; mga negosyante nanawagan sa Customs

Andam ang Police Regional Office (PRO) 7 ubos sa liderato ni Chief Supt. Debold Sinas sa mando ni Presidente Rodrigo Duterte sa pagdumala sa kontrobersyal nga Bureau of Customs (BOC).

Apan ang Filipino-Cebuano Business Club Inc. (FCBI) nipadayag sa ilang kabalaka sa epekto kon mohulip ang mga personahe nga dili suheto sa proseso sa import ug export.

Si FCBI president Rey Calooy nagkanayon nga seguradong makaapekto kini sa ahensiya.

Nanawagan sila sa pagrekonsiderar sa hukom sa presidente human nasuko pag-ayo sa paglusot ang binilyon nga balor sa illegal nga drugas sa pantalan sa kaulohan.

Nipagawas og kamandoan si President Duterte nga ipaubos sa floating status ang tanang kawani sa BOC human malampuson nga nakalusot ang kapin sa P11 billion nga balor sa illegal nga drugas nga gituohan nga gisulod sa magnetic lifter.

Ang bag-ong Customs Commissioner nga si Retired General Rey Leonardo Guerrero, kanhi Chief of Staff sa armadong kusog sa nasud gimandoan nga paphaon ang mga gituohan nga apil sa mipalusot sa ilegal nga drugas diha sa pantalan.

Ang maong lakang gisuportahan ni Sinas sanglit adunay kapasidad ang mga sundalo tungod sa ilang nahibaw-an sa training ilabi na sa intelligence nga aspeto.

Gipanalipdan sa heneral ang desisyon sa Presidente nga mga sundalo na ang modumala sa BOC tungod kay nasagmuyo na kini nga aduna pa gihapoy molusot nga ilegal nga drugas gikan sa gawas sa nasud bisan sa iyang higpit nga mando.