Hepe sa Police Station 4 sa LCPO mipasabot sa bisita
Giklaro sa hepe sa Police Station 4, Lapu-Lapu City Police Office (LCPO) PCI Juan Capacio nga wa silay dautang tuyo sa ilang pagduaw sa panimalay sa matag kandidato nga magpapili sa umaabot nga midterm elections sa sunod tuig.
Kini human nga ila nang nadawat kadtong suwat reklamo gikan sa kampo ni mayoralty aspirant Junard Chan nga nakamugna og alarma ang gihimo sa usa ka sakop sa naasoyng presinto hinungdan nga nabalaka sa ilang seguridad ang usa sa kaalyado PDP-Laban/Team Libre.
Gibutyag ni Capacio nga human sa pagduso sa certificate of candidacy (COC) sa mga kandidato niadtong Oktubre 17, gimanduan ang tanang station commander sa director sa LCPO PSSupt. Limuel Obon mo ila-ila sa mga kandidato nga nagpuyo nga nasulod sa hurisdiksiyon sa matag police stations.
Sa sayo pa, nangayo og pasaylo ang director sa LapuLapu City Police Office PSSupt. Obon ngadto sa mga kandidato nga naalarma sa gihimo sa iyang sakop.
Ang grupo ni Chan mipatawag og press conference sa katuyoan nga mapadayag ang matod pa harassment nga gihimo sa kapulisan ngadto sa ilang kaubang kandidato nga si Kim Francisco taga-Barangay Basak ug Joy MoralesBarangay Sta. Rosa, isla sa Olango kinsa nakalitan sa presinsiya sa pulis ug nagpangutana sa ilang pagkatawo.
Ang maong suwat gi-address ngadto ni PCI Juan Capacio, hepe sa Station 4 sa dihang giila ni Francisco ang pulis nga si SP01 Ronaldo Nuñez nadestino sa Station 4 nga maoy mitunga sa iyang balay diin ang iyang misis maoy gikaatubang sanglit na-atol nga wa siya sa iyang balay niadtong tungora.
Gikuwestiyon ni Atty. Eugene Espedido, nagpapili sa pagka-kongresista ang maong paagi sanglit anaa tanan sa ilang certificate of candidacy (COC) nga giduso sa buhatan sa Comelec masayran sa pulis ang ilang personal profile inay pakalitan ang kandidato nga morag gi-Tokhang.
“That was a wrong approach,” matod pa ni Obon sa gihimo sa iyang pulisa ug mipasalig nga iyang ipatawag pag-usab ang tanan niyang station commander aron hisgutan ang maong isyu.
Giangkon ni Obon nga adunay giluwatang kamanduan gikan sa ilang rehiyonal nga buhatan nga ila-ilahon ang matag kandidato ug kapanalipdan nila sa higayon nga nahulga ang seguridad nunot sa eleksiyon.