27 ka quarry operations nahibalik na
Walo na lang sa 35 ka mga small-scale quarry company sa lalawigan sa Sugbo ang wala pa makabalik sa pag-operate human temporaryo kining gisuspenso sa miaging buwan nunot sa nahitabong landslide sa siyudad sa Naga.
Subay niini, balik na sa ilang operasyon ang moabot sa 27 ka quarry sites, nga nagoperate og lima ka ektarya paubos apan matag karon ug unya subject sa monitoring sa Provincial Environment and Natural Resources Office.
Gitug-an ni PENRO Head Jayson Lozano nga 7 sa walo nga wala makabalik sa pag-operate, mao ang smallscale quarry companies nga anaa sa dakbayan sa Naga.
Matod ni Lozano, nihatag na unta ug go signal ang ilang opisina paglibkas sa suspensiyon sa ilang operasyon apan nihangyo si Myor Kristine Chiong nga i-oktaba una kini.
Sa nasayran, dul-an sa 80 ang nakalas sa nahitabong landslide sa Naga niadtong Septiyembre 20 mugna usab sa quarry operation sa sitio Sindulan, Barangay Tinaan sa maong siyudad.
Nunot sa maong hitabo, gipasuspenso gilayon ni Gob. Hilario Davide III ang operasyon sa mga small-scale quarry operation sa probinsiya niadtong Septiyembre 21.
Gawas sa 7 sa Naga, usa ka small-scale quarry company sa lungsod sa Carmen ang wala pa usab makabalik.
Matod ni Lozano nga mugna kini sa mga liki nga nakita sa quarry site dihang gisusi.
Ang PENRO gitabangan sa Mines and Geosciences Bureau sa gihimong pag-inspeksiyon sanglit wala may kaugalingong geogolist ang provincial government.