‘In aid of reelection’

Gibutyag ni Senador Grace Poe atol sa iyang pagbisita dinhi sa Sugbo niadtong weekend nga mosang-at siya og resolution sa Senado sa tumong sa pagpahigayon og senate inquiry sa sunodsunod nga mga pagpamatay dinhi sa Sugbo ug sa tibuok region nga may kalambigitan sa kampaniya sa administrasyon batok sa illegal nga drugas.

Base sa report nga mi-abot na sobra 200 ang kaso sa pagpamatay dinhi sa region. Nakapa-alarma na sa publiko ang maong gidaghanon. Unya kadaghanan sa maong mga kaso, wala gyud masulbad.

Wala na gani ma-imbestigar sa kapulisan ug sa Commission on Human Rights

(CHR) gumikan kay walay mga saksi. Pipila ra kabuok ang nasang-at ngadto sa korte.

Unsa may tumong ni Senador Poe niining iyang lakang?

Nahibawo naman kita nga ang mga imbestigasyon sa House of Representative ug sa Senado ‘in aid of legislation’ man. Unsa may buot ipasabot aning ‘in aid of legislation’?

Gitumong kini aron kon unsa man ang gi-imbestigahan adunay maumol nga balaod.

Unsa may posibleng maumol nga balaod niining kaso sa pagpamatay?

Aron masilutan ang mga naghimo niini? Aduna nay kasong murder nga naa sa atong Revised Penal Code nga magsilot niadtong nakahimo sa maong salaod.

Gani nagtangag man kini og bug-at nga silot. So, unsa pa may tumong ani?

Pagkadaghan nang gihimong Senate ug House inquiries apan daghan ba sila og na-umol nga mga balaod sa mga kaso o isyo nga ilang naimbestigahan?

Puwerting daghana na nato og mga balaod. Dili ‘in aid of legislation’ ang tumong ni Senador Poe niini.

Ingna hinoon ko nga ‘in aid of reelection’ ang iyang tumong niini kay magpapili man siya pag-usab karong sunod tuig nga eleksiyon.

Iya lang ning gigamit aron siya mamatikdan sa publiko og mobutar kaniya ang katawhan.