Muslim nga kandidato ni Digong

Sa tulo ka kandidato ni Presidente Rodrigo Duterte nga gikan sa Mindanao, dunay usa nga Maguindanaon nga mao si Cong. Zajid Mangudadato nga usa ka Muslim.

Matod pa, gipadagan ni Digong kini si Zajid aron dunay representante ang atong mga igsuong Moro diha mismo sa Senado.

Apan, sama nako dihang una kong nakadungog sa ngalan ni Zajid, abi gyud nako nga ang nidagan alang sa pagka Senador mao si Maguindanao Gob. Toto Mangudadato.

Kahinumdoman, ang mabdos nga asawa ni Toto usa sa 58 ka mga biktima sa giingong Maguindanao Massacre sa miaging 2009 diha sa mga kamot sa pamilyang Ampatuan.

Nasayop diay ko. Ang igsuon ni Toto diay nga kongresista nga mao si Zajid ang nidagan pagka senador.

Sa akong nahibaw-an gikan sa pipila ka sakop sa Kilusang Pagbabago, kini si Zajid suod ni Presidente Duterte ug kasaligang moduso sa pederalismo kon masulod sa Senado karong Mayo 2019.

Usa diay kini si Zajid sa gi-anunsyo sa Kilusang Pagbabago nga ilang suportahan human sa usa ka Visayas-wide congress sa miaging Dominggo.

Moabot sa 300 ka mga lider sa KP gikan sa tulo ka rehiyon sa Visayas ang nitambong sa giingong Visayas Congress sa grupo nga diha gipahigayon sa Cebu Provincial Capitol.

Gawas ni Zajid Mangudadato, suportahan sab sa KP Visayas sila si Sen. Cynthia Villar, PNP Chief Bato dela Rosa, Sec. Harry Roque, ug SAP Bong Go.

Sa miaging Dominggo lang sab ko nasayod nga kini si Zajid dunay mga proyekto alang sa pagpalambo sa Liguasan Marsh diin nadiskubrehan nga duna diay dako kaayo nga pundo sa methane gas.

Alang kanako, dakong bentaha karon kining pagsuporta sa KP kay mao kini ang grupo sa mga Duterte supporters nga mokuot sa ilang kaugalingong bulsa aron lang makatambong sa ilang Kongreso. Lalim bay moabot sila og kapin sa 300,000 ka mga sakop sa tibuok Visayas.

Sa akong nabal-an sa KP, ang matag sakop mismo diha sa kabarangayan kay mangunay sa pagpangampanya alang sa ilang kandidato bisan og wala kiniy suhol. Mas magtampo-tampo kini aron ang ilang pagkampanya maingon gyud nato nga boluntaryong tabang alang sa mga kandidato nga ilang gituohang makaduso sa ilang kawsa nga mao ang pederalismo.

Sa pagkakaron, nianunsyo silag lima ka mga kandidato. Apan himuon kini nilang walo sa sunod nga mga semana.

Unya ang bakanteng upat kay i-reserba sa matag sakop nga dunay ilang kaugalingong kandidato nga lahi sa ubang mga sakop sa Kilusang Pagbabago.

Ato sab nga nahibaw-an nga inig human sa Sinulog 2019, giplano sa KP Visayas ang usa ka Visayas-wide political summit ug Visayas-wide nga campaign caravan. Nasiguro ko nga dako kini og matabang alang sa mga kanidato alang sa pagka senador nga ilang gisuportahan.