I believe in dreams
Kon sabton gyud pagayo, angay kong malipay. For the first time in my life, nakabaton na gyud kog boyfriend. Daghan ang nag-ingon nga tomboy ko kay bisag sa kadaghan sa akong mga suitors, wa koy gisugot nila.
Kanindot diay sa feeling sa tawo, uy, kon dunay inspirasyon. Aw, ingon man gyud ani, ang binuhat nga gikarelasyon mahimo man natong inspirasyon sa kinabuhi. “Love ba gyud ko nimo?” “Oo, Bonna. You’re my one and only. Korni, no?”
Nagkinataw-anay mi. Unya dugay ming nagkatinan-away samtang nagtapad paglingkod sa Bermuda grass sa among lawn. Nagkalawom na ang gabii niadtong tungora. Mipiyong ko dihang iya kong gigakos ug gihagkan sa lips. Migakos kog hugot niya. Apan kalit kong nakamata. Nagdamgo lang diay ko. Maoy akong namatngonan nga naggakos ko sa unlan samtang naghigda ko sa kama. Igo na lang kong nagpanglingo. Usa lang diay ka damgo ang tanan. Gianugnan ko sa akong gugma nga kalit nga nahanaw.
Misandig ko sa headboard sa kama. Gihunahuna ko ang akong damgo. Mora gyud kinig tinuod. Gihikap ko ang akong mga ngabil. Morag nabatyagan ko pa ang kainit sa lips sa lalaki nga mihawok nako. Apan kinsa man diay tong lalakiha? Wa ko makaila niya. Nahikatawa na lang ko nga mao rang usa. Kinsa man say di mahikatawa nga ang lalaki nga boyfriend nako sa akong damgo di man diay nako kaila?
Puwerteng katawa ni Jinno pagsulti ko kaniya sa tanan. Diha mi sa among plasa sa lungsod nga among gipuyan. Nanuroy mi niadtong tungora. Bugnaw na man gani ang hangin kay hapit na man mogabii. Nia mi karon sa among lugar kay semestral break na man.
“Sus, motuo ka man anang damgo, Bonna. Balit-ad na sa tinuod, uy. Ang buot ipasabot ana, di gyud ka makabaton og boyfriend. Mahimo kang guwang nga dalaga ana.”
Mitukikig katawa si Jinno. Giyam-iran ko siya. Ug nahapak sa bukton.
“Unsay mahimong tiguwang nga dalaga? Kining kong beauty di maminyo?” Nakusi ko sa kilid ang akong best friend tungod sa akong kalagot.
Ingon gyud ani si Jinno nako. Kanunay lang ko niyang kumedyahan. Ambot sab ning tawhana, uy. Guwapo man unta apan bayuton man. Hilig kaayo sa pagpakigbarkadag lalaki.