Bathalad Cebu milusad pagpangita sa ‘Kaplag 15’

Ang Bathalan-ong Halad sa Dagang (Bathalad) Sugbo mosaulog sa iyang ika50 nga sumad sunod tuig sa pagkatukod, diin ang kasaulogan ipahigayon sa Palm Gras Heritage Hotel sa dakbayan sa Sugbo, milusad sa “Kaplag 15” sa pagpangita sa labing madungganong magsusulat nga buhi sa Post-War era sa Sugbuanong pinulongan.

Kriterya: 1. Way hunong nga pagsulat sulod o labaw sa 40 katuig og balak, sugilanon, gumalaysay, nobela, drama ug libro (30%); kalidad sa lawas-han-ay sa mga sinulat o libro nga napatik (30%); nakaangkog mga ganti, pasidungog/pag-ila sa natad sa pagsulat (20%) ug may liderato sa tinguha sa pagpalambo sa pinulongan ug katitikang Sugbuanon (pangulo/opisyal og literary group) 20%.

Makatuboy si bisan kinsa apil ang mga pundok/asosasyon o organisasyon sa mga magsusulat sa angay sa pasidungog ubanan sa iyang bio-data ug cel no. tinimaan sa tag-iya mismo ug sa nagtuboy.

Ang "Kaplag 15" gidumala sa Council of Past Presidents sa Bathalad.

Duha ang kasaulogan sa Bathalad golden jubilee sunod tuig: Founder’s Day sa Pebrero 25, 2019 agig pagtahod sa magtutukod nga si Dr. Mel Allego nga motambong gikan sa Amerika. Iatol usab ang awarding sa 15 Great Writers sa Sugbuanong dila sa Post-War era ug uban pang espesyal nga mga pasidungog. Sunod ang Presidents’ Day sa Agusto 25 diin hatagag pasidungog ang 10 Most Outstanding Young Writers sa millennial period.

Kining 2 ka pasidungog pagatawgog Vicente Sotto ug Vicente Ranudo Literary Excellence Awards alang sa napiling outstanding writers. Ang mipahuway nang mga banggiitang magsusulat hatagan sad og pasidungog.

Deadline sa nominasyon karong Disyembre 15, 2018. Ipadangat kini sa Superbalita, P.del Rosario St. Cebu City c/o Rolando S. Morallo o Lamberto G. Ceballos ug Ernesto D. Lariosa-Kulomnista, Super B.