Kaso sa mga batang lalake nga giabusohan misaka: CLB
Sulod sa unom ka tuig nga aktibo ang Children’s Legal Bureau Inc. (CLB), nakita niini nga nisaka usab ang giabuso nga batang lalaki gawas sa mga nag-unang giabuso nga batang babaye.
Niabot sa 40 ka mga bata ang na-rescue gikan sa 9 ka mga managlahing langyaw nga giabuso ang mga bata pinaagi sa paghilabot niini o pakighilawas.
Matod ni Atty. Noemi Truya-Abarientos, tigpamaba sa CLB, nga 20-30% sa mga bata nga ilang naluwas mga lalaki.
Uwahing na rescue nila ang 14 ug 16-anyos nga giabuso sa usa ka German National sa dakbayan sa Lapu-Lapu.
Usa sa nakita nila mao ang peer-pressure hinungdan nga mosulod usab sa pagpang-abuso kining mga batang lalaki.
Matod ni Abarientos nga kasagaran sa mga lalaki nga menor nga gi-abuso, gi-recruit ra usab sa ilang amigo nga naabuso na.
Usa ang Sugbo nga lakip sa top 5 sa mga probinsiya sa nasod nga taas ang kaso sa child sex tourism ug online sexual exploitation.
Tungod kay sikat ang Sugbo sa mga maanindot nga tourist spot sa nasod hinungdan nga aduna’y mga kaso sa child sex tourism diin dad-on sa mga langyaw ang mga bata sa mga nag-unang tourist destination sa Sugbo aron gamiton o abusuhon.
Lakip sa mga lugar sa Sugbo nga nakatala ang CLB nga aduna’y kaso sa child sex tourism ug exploitation kining sa dakbayan sa Naga, Bogo, Toledo, Lapu-Lapu, ug mga lungsod sa Boljoon, Argao, San Remigio, Madrediejos, Santa Fe, Bantayan sa Isla Bantayan.
Nasayran usab nga base sa ilang reports nga madawat, ang mga menor-de-edad na karon ang mo-offer sa mga langyaw sa ilang serbisyo.
Nakita usab sa CLB nga sagad sa mga langaw nga ilahang na-monitor nga nasikop na karon sa aotoridad, aduna kini’y kaso sa ilang kaugalingong nasod sa susamang klase sa pag-abuso sa bata.
Awhag niini sa gobyerno nga unta, dili pasudlon sa nasod kining mga langaw nga aduna’y kaso nga susama niining pag-pang-abuso sa bata.
Gawas sa kapobrehon, usa ning bayaran sila sa langyaw hinungdan nga madani ning mga bata nga gipang-abuso.
Ang CLB, anaa na karon sa ika-6 tuig isip batok niining child sex tourism ug online sexual exploitation.
Kagahapon, Oktubre 30, gihimo ang ika-6 nga Cebu Against Child Sex Tourism conference nila diin aduna kini’y tema nga “Eliminating Gender-based Violence Against Children and Advancing Economic Empowerment for Youth.”
Hangyo usab nila sa gobyerno nga hatagan ug dili hikawas sa trabaho nga tarong kining mga bata aron dili mahibalik sa ilegal nga kalihokan ug pagpang-abuso nga mga kalihokan.