SAKOP SA DRUG GROUP NAPATAY

Giilang sakop sa dakong grupo sa mga drug pusher ang napatay sa mga sakop sa Provincial Drug Enforcement Unit sa Cebu Provincial Police Office niadtong Lunes sa hapon sa Sitio San Roque, Barangay Basak, sa syudad sa Sugbo.

Matod ni Sr. Insp. Alejandro Batobalonos nga maoy nangulo sa gihimong buy bust

operation, bata-bata sa usa ka bag-ong laya gikan sa New Bilibid Prison sa Muntinlupa ang namatay nga si Marlon Lauronilla Dejino, 19, nga nag puyo ra usab sa maong dapit.

Ang drugas nga nakuha gikan sa maong suspetsado moabot ngadto sa 25 gramos nga gibana-bana nga mobalor sa P295,000. giingong gikan gihapon sa kaulohan.

Niadto pang miaging semana migawas ang pangalan ni Dejino sa dihang nakadakop ang PDEU sa usa ka babaye didto sa syudad sa Naga diin siya ang gitudlo nga maoy tig-supply kanila sa illegal nga drugas. Nangayo sila sa numero sa

cellular phone sa suspek aron mo order og drugas ug dinhi na nagsugod ang ilang gihimong surveillance.

pagka Lunes, gihimo dayon nila ang buy bust

operation sa dihang mitando kini nga didto sila mag abot sa fly over sa barangay Tabunok, sa syudad sa Talisay apan nausab ang huna-huna sa suspek gibalhin nalang kini sa barangay Basak San Nicolas.

Unang miduol kanila ang 15 anyos nga nanguta kung sila ba ang mopalit sa illegal nga drugas.

Sa dihang nakabantay nga usa ka pulis ang gikasabot, si Dejino midagan kini paingon sa usa ka hilit nga lugar ug mibunot sa iyang armas.

Misuway kini pagpusil sa mga police apan naunhan kini ug maayong pagkaigo. Gidali man tuod siya pagdala sa tambalanan sa C ebu City Medical Center apan gi deklara kini nga dead on arrival.

Lakip sa nasikop si Edrico Abadilla Caballero, 27, ug ang menor de edad nga miangkon nga siya ang tighatod sa mga mopalit sa illegal nga drugas.

“Midagan man siya sa interior portion didto na nahitabo kay mibunot man siya nya padung na mamusil namo,” matod ni Sr. Insp. Alejandro Batobalonos.

Samtang moabot usab sa P106,200 nga balor sa drugas ang nakuha sa mga sakop sa Waterfront police station atol sa gihimong buy bust operation sa Sitio Cahipa, Barangay Hipodromo sa syudad sa Sugbo.

Ang mga nadakpan giila nga silang Lou Anthony Ordona, 34, ug Kris Mariscal nga iyang konsabo sa negosyo.